Kensington Market, Beer Fest und Calgary

Am nögste Tag hemmer denkt mir sind eifach mal echli fuul und mached: nüt. Naja nüt isches dänn nöd gsi aber nacheme seeeeehr gesunde zmorge (Granola Bowl) simmer eigentli nur is Eaton Center zum echli go shoppe. Obwohl mer irgendwie nüt gfunde hend simmer nacher gnueg kaputt gsi zum wieder nüt mache. Am abig hämmer eus Dim Sum hei bstellt (hend ja schliesslich Chinatown vor de Türe) und sind den is näscht.

Am negste Tag hemmer es gigantisches Programm gha. Als ersts wiedermal e food tour. Und dasmal isch sie unglaublich guet gsi, de Kevin euse Guide isch au de Chef vo de Firma gsi und das hetmer gmerkt. Und mir hend unmenge a Esse übercho. D Tour isch hauptsächlich im Chinatown und in Kensington Market duregfüert worde. Dim Sum (ja scho wieder), Springrolls, Jamaican Patties (Min favorit, echli wie e empanada aber mit scharfem Rindfleisch) und na vieles meh hemmer probiert und alles isch mega gsi. De Dessert isch en "Joe Louis" gsi, kei ahnig wieso das so heisst, aber es isch mega süess und mega guet gsi. Und a lustige isch, Kensington Market isch e mega cools Viertel wo eus mega gfalle hett (was neus in Toronto) und es fangt 50m hinder eusem Airbnb ah, eusi Location isch also eigentlich unschlagbar gsi ohni das mirs realisiert händ. Mengisch muesmer hald eifach echli go erkunde, au wann d Umgebig uf de erst Blick komisch usgseht. Nacheme churze Verdauigs-schläfli simmer den de negsti Programmpunkt ahgange: es Bierfestival ufere offene Terrasse mit Blick uf de CN Tower. D Location selber isch mega cool gsi, d Bier aber eher mittelmässig und vorallem mega chlini Uuswahl für es "Festival". Es het aber mega gueti Calamari geh. Mir sind den no uf es paar besser Bier is Beertown. Die Bar isch uf de Erst (und de Zweit) Blick eigentlich überhaupt nüt für eus, echli e Sportbar wo nur generischi Sache serviert und dementsprechend isch a s Publikum. Aber: d Bierliste isch fantastisch gsi, und ich ha entli die super hyped Third Moon Bier chönne probiere (Ja sie sind genial). Nach dem Riese Programm simer den aubkaputt gnueg gsi zum is Bett gha. Mir hend also tatsächlich Dank em Kensington Market euse Friede mit Toronto gmacht.

Am nögste Tag simmer den usem Airbnb uszoge und mo de St Lawrence Market und d Undeground City go aluege bevor mer an Flughafe gfahre sind. De Flug uf Calgary isch bitzeli holprig aber ok gsi. In Calgary acho simer den direkt is Airbnb (endlich e guets) und go schlafe, isch ja au scho 11i gsi.Read more