Flitterwochen

Gester simer mitra Fähra nach Kos. D’ Fahrt an sich duret zwar nur 30min, aber do’s as anders Land isch gits a Passkontrolle bim istiege und usstiege. Drum durets denn glich a bits. 1 Tag vorher hemer das vor Ort do am Hafa buacht. Lustigerwis hets gad 2 Büros nebanand ka wo zglicha abüten, mier hend den üs für das Büro entschieda wo seriöser gwirkt het uf üs😅 Hifahrt isch ganz guat gsi. De Erol het den no über sini hellbruna Hosa de türkischi Kaffe gschüttet🤣 zu sinera Beruhigig ma hets ni all zu guat gseh und i ohni Brilla hans sowieso ni gseh daher bini sicher a guata Referenzberich gsi😁
In Kos ahko hemer gad as Foti wella macha bi dem Logo „I love Kos“. Vor üs sind dütschi gsi, de Mah vu dera einta, namens Heike het gmeint: „ Heike mach mal ein Foto von denen“ 🤣 de Erol wie charmant er isch het er den ihra gseid: „Danke Heike“ dia hets natürlich ganz toll gfunda das so an junga Herr sie mit Nama aspricht😅
Nach dem Fotoshooting simer witr zur Hippokrates Statue uf dem Weg döt hi hets a Hundefight geh. Je das isch würkli crazy gsi, 2 würkli grossi Hünd sind ufanand los. De einti an Streuner und de ander isch eifach ni ade Leine gsi. De Bsitzer isch imna Kaffee am sitza gsi. Als voll los ganga isch hend den de Bsitzer und no an andere Herr agfanga schreie aber die Hünd hend zerst ni vunanand loh hend sich bissa dies das. Mitma Wasserschluch hends den dia Hünd usanand brocht.. aswie het mr de Streuner leid tua de isch den ab und het so trurig zruck gluagt..
Bir Hippokrates Statue hets recht viel Menscha ka. De Hippokrates kenned sicher viel, er isch an Arzt und Lehrer gsi. Gad ide nöhi hets de Baum „Platane des Hippokrates“ ka. Unter dem Baum hägi der Hippokrates unterrichtet. De Baum isch 2400 Johr alt, würkli idrücklich wen ma sich das mol überleid. De Baum het aber schu glitta..
Spöter simer in as Kaffi ikehrt, döt hets a freddo Cappuccino geh, das sei a Spezialität vu Griechaland. Für mi isch de kaffi zu stark gsi🥸 han den spöter a freddo Latte gno de isch besser gsi😂 zuadem hemer a leckers Getränk entdeckt ka, kaum Kcal und sehr erfrischend. Es het diversi Sorta geh, vu Ingwer bis zu Erdbeerli und Spezialität Kanelada (Zimt-Getränk genau mis Ding).
Zmittag hemer uf Empfehlig vumna Wirt (de hemer do in Bodrum kennaglernt) imna iheimischa Resti gessa. Es het Moussaka geh mit Brot und zaziki. Sehr fein gsi aber riesigi Portiona haha de Wirt het den gfrogt ka obs ni fein gsi isch, den hemer ihm erklärt das es zu viel gsi isch😋
De Nomitag hemer in dr Altstadt verbrocht. De Erol het eigentlich ums verrecka a Roller wella mieta, do bini gar ni dabi gsi😅 i vertraua natürlich de Fahrkünst vum erol aber ni dena anderena🥸
Z Fuass simer au guat vorah ko ;) sind no gmüetlich dussa ghöcklet imna Kaffi, döt hets au dia feina Getränk geh. Döt hemer eifach de Moment und Sonna gnossa, i han mi den no kli ind Arma vum Erol gleid und es isch perfekt gsi🥰

1h vorher hemer müessa bim ichecka vu de Fähra si wels natürlich alles schön kontrolliera hend müessa. Rückfahrt isch für mi kli müehsam gsi es het mega gschwanked, ischmr kli übel worda.. bin froh gsi als ich wieder Land gspürt han unter da Füess😄

Znacht simmer wieder ins glicha Resti wo mr schu paar mol gsi sind. De Wirt isch mega nett, kocht super fein und git au immer öpis gratis🙃 also nu weg em gratis gömmer den nita😅

Isch a idrucksvolla Tag gsi dementsprechend simer au müed gsi😴

De hütig Tag isch dafür sehr gemütlich gsi. Sind de ganz Tag am Pool gsi und hend am spötera Nomitag üs a Massage gegönnt💆🏻‍♀️💆🏻

Highlights:
- Leckera Getränk
- Im Kaffii Sünnala und Entspanna
- De Erol (als waschechta Türk) het feindliches Territotorium überlebt 😂😂
- MassageLue lisää