Indonesie und Südostasie

Gester morgä hanni mi nocheme guete iiskaffi ufe wäg richtig hafe gmacht woni denn s boot richtig sanur(bali) gnoh ha. Dört hanni denn eh roller gmietet und ha mi ufe wäg richtig pemuteran gmacht. Zerst fahrt meh zimli lang durch ganz denpasar dure was rächt viel ufmerksamkeit verlangt aber wenn meh das denn gschafft het wird meh defür mitere lange fahrt durch riisfälder, tschungel und schöne vulkanlandschafte belohnt. Unterwägs hanni denn mol neume ahghalte füre traditionells gricht wos nur in däm teil vo bali git. Nachem überquere vo de hügel, fahrt meh denn no öbbe eh stund alles em meer entlang bis uf pemuteran. Vo sanur bis pemuteran durchquert meh also eigentlich eimol ganz bali. Es isch uf jede fall eh cools gfühl wieder die kultur z spüre, d grüch z schmöckä und die viele fründlich griinsende ihheimische z gseh. In pemuteran chummi dasmol bi fründe unter wo im früehlig ihres eigene homestay fertig baut hän. Eh schwiizerin wo miteme ihheimische zämme isch und im April jetzt äntgültig do ahne zoge isch und grad ihre divemaster in de tauchschuel macht wo ich letzt joor im projäkt gschafft ha. Isch rächt cool da si halt au do wone und mr so zobe viel ziit zämme verbringe und s beste isch dass ich d chuchi cha bruchä🤩. Als eh person wos chochä liebt isches eh riise freud wenn meh nach fast 8 wuche ändlich mol widr cha go ihchaufe was meh lust het und denn für sich sälbr chochä. Dämentspächend hets hüt zum zmorgä improvisierti haferflocke/banane pancakes geh zum die viele überriife banane ufbruchä natürlich mit früscher mango dezue. Zum zmittag hanni denn d teigware wo scho gchocht im chüehlschrank gsi sin verwärtet und zum znacht hanni irgendöbbis improvisiert mit ganz viel gmües(broccoli🤩), kokosmilch, limette, zitronegras, chilli, ingwer... und dezue hets denn ketupat (sone art verchläpte riischlumpä wo meh in stückli schniidet) geh. Mini Gastgäber hän sich hüt also eher wie d Gäst gfühlt und denn druf bestande dass si wenigstens dörfe abwäsche was mi natürlich nit gstört het. Fühlt sich fast bitz ah als wäri dehäi ahcho nach lange ferie eifach dassi immrno im paradies bi. Da ich immernoni cha tauche, isches zimli hart de ganz nomidaag im tauchshop z verbringä aber au schön will meh ständig mot irgendöbberem schwätzt und d ziit nur so verfliegt. Hüt morgä hanni vor de pancakes no eh schöne morgespaziergang gmacht ufe hügel hinterem homestay. Ich dänk wenni denn wieder cha tauche und immerno do bi wirds richtig richtig hart wieder vo do z goh.Read more