Reset search
Kambodscha via Bangkok
  • Wildflower
  • Fabienne Rindlisbacher
  • Wildflower
  • Fabienne Rindlisbacher

Kambodscha via Bangkok

Auslandseminar + Read more
FollowInsightsInsightsCalendarCalendarPhotosPhotosShareShareBucket list
Newest first
  • Trip start
    October 28, 2022
  • Kambodscha via Bangkok
    22

    Reizüberfluetig

    October 30, 2022 in Thailand ⋅ ☀️ 32 °C

    Am 2. Tag in Bangkok si es paar vo üs am Morge früeh ga dr Königspalast besichtige. D Michelle und Kelly heine scho mau gseh u si drum ned mitcho.
    Drna heimer üs mit ihne bim Wat Pho Tempel troffe und si dä zäme ga aluege. Zum Zmittag hets riis, curry u gmües gä - es isch wahnsinnig fein gsih!

    Früsch gstärkt heimernis ufd Suechi nachem Hop-On Hop-Off Bus gmacht womer im Internet hei gfunde. Zum Glück heimernis vorhär gsterkt will mir si 40 minute gloffe u hei drna no 20 minute ir sunne gwartet bis dä Bus du de ändlech isch cho. Mir hei vorallem Stou gseh abr es isch glich e guete Wäg gsih zum i üsere churze Zyt dert viil vor Stadt zgseh.

    Zrugg im Hotel heimer no e churze Schwumm gno bevor mer üs hei zwäggmacht zum ga Znachtässe.

    Nachem Znacht heimers üs natürlech nid chöne la entgah no bir Khao San Road verbi zluege. Di Strass wo vor allem füre Tourismus isch, isch voll mit Bars u Verchöifer wo eim vo frittierte Skorpione übers Lachgas und Chüble voll Drinks bis zu lüchtende Haarreife alles hei welle adräie.
    Alles in allem isch di Strass rächt e Reizüberfluetig gsih abr ds isch öppis wo mu eis im Läbe mues gseh ha.    Read more

    See translation
  • Kambodscha via Bangkok
    Der Rami mi TukTukchauffeur
    45min Flug, es MuggeschissliDer Pool vom Hostel The PlaceD Chuchi wo üses Znacht isch gchochet wordeFlughafetransfer

    សួស្តីកម្ពុជា។

    October 31, 2022 in Cambodia ⋅ ☀️ 31 °C

    Und witer geiz -> Kambodscha. Siem Reap würkt gad sehr ruhig im Verglich zu Bangkok..ömu ufe erscht Blick. Die Iheimische si sehr hiufsbereit u viuweniger ufdringlich. Wöumir ab Morn ade Gruppearbeite schaffe fürd Schuel hetsich hie üsi Gruppe gsplittet fürne Nacht. Es pari si scho iz Hotel womir när mitder Schuel si, anderi ines Homestay u ig bi vom Rami vom Flughafe zumene Hostel tucktucklet worde wo d Sophie o isch. Z Hostel isch sehr suber u mit viu liebi zum Detail igrichtet. Am Abe simir schowider ire Partystrass glandet dasmau ir Pupstreet. Dert hani de mi erst Idruk vomene ruhige Stedtli müesse revidiere.Read more

    See translation
  • Kambodscha via Bangkok
    E spezielli Erfahrig aber mir hei viu glachet

    TukTuk & Floating Market

    November 1, 2022 in Cambodia ⋅ ☁️ 30 °C

    Scho am erste Tag in Kambodscha hei mier dänkt mir stige voll i di lokali Kultur ih und si mitem Tuktuk ids öppe ei stund entfärnte Kampong Phluk Floating Village gfahre. Uf dr abentüürleche Fahrt dert häre heimer scho ganz viil Idrück gsammlet vo däm spannende Land. D Floating Village sälber heimer natürlech nume miteme Böötli chöne ga agugge. O das isch rächt abentüürlech gsih miteme usboute Outomotor als Atrieb und Benzin wo üse Chauffeur bi eim vo dene Hüsli ime Plastikseckli het kouft. Mir si dürds Dörfli gfahre u ner ufe Tonle Sap See usi wo no es einzelns Böötli als Floating Market isch verbicho.
    Mu hätti ono chöne miteme Ruederböötli id Mangrovewälder innifahre zum Krokodil und anderi Tier gseh abr ds heimer usseglah wäge dr Zyt.
    Alles in allem isch ds e wahnsinnig spannende Usflug gsih & mir hei scho mega viil Iblicke i ds interessante Land becho.

    Am Aabe isch ds Seminar när richtig losgange. Nacheme churze Kick-Off vode Coaches hets es Znacht gä & drna e chlini Challenge, nämlech wie di ganzi Klass i einzelne Tuktuks d Bar findet wos no e Drink het gä.

    Zum Abschluss si es paar vo üs no überd Pub Street glüffe.    Read more

    See translation
  • Kambodscha via Bangkok
    D Herorat Dora
    Miss MarpleD Sara u der Paul mit Ihrem CheffchochWat Svay DonkumD Herorat Sophea

    vom Mönch gsägnet

    November 2, 2022 in Cambodia ⋅ ⛅ 24 °C

    Hüt isch der erst Tag gsi womir mitem Studium si underwägs gsi. Am Morge heimir üs nachemne wahnsinns Zmorgebuffet mitder ganze Klass u üsere TukTuk-Karavane i wuselig Verchehr vo Siem Reap begä. Aus ersts simir Apopo ga aluege. Das isch es NGO wo Afrikanischi Riseratte zu "Herorats" usbiudet. Si chöi Landmine erschnüffle u hei so scho 1000 vo Läbe grettet. Dür das, dass die Ratte "nume" öppe 1,5 kg schwär wärde lösesi im Verglich zumene Hund d Mine nid us wesi drufstö. Die wärde nämlich "ersch" ab 4-5kg usglöst. Nachdäm üs d Sophea het vorgfüert wiesi TNT fingt u när gnüsslich ires Gudeli främslet heimir no d Dora dörfe hämpfele.

    Nach Apopo isches mit üsne private TukTukChauffeure witer zum Tempel Wat Svay Dongkum dert simir vomene Mönch für üses Seminar und d Reis gsägnet worde. Z Ritual isch für es pari chli befrömdlich gsi, für anderi sehr inspirierend. Nachdämnis üse Tourguide no d Gschicht vom 4. Buddha het verzeut, simir witer für im Haven ga Zmittag z ässe.

    Z Haven isch üses (Fabienne, Sophie und Maylea) Projekt für das Seminar. Mir hei gad d Sara u der Paul atroffe. Si si d Inhaber u Erfinder vom Restaurant und Trainingszentrum Haven. Zum Zmittag simir mit lokale Gricht verwöhnt worde. Nachemne intresannte Gspräch mitder Sara, em kennelehre vor Miss Marple und es par Video- u Fotoufnahme heimir üs wider ufe Wäg zrügg iz Hotel gmacht. Hie simir no chli a Pool gläge u heinis när hindere Laptop gsetzt für a üsem Seminarpapier z schaffe.    Read more

    See translation
  • Kambodscha via Bangkok

    Tempel, Tempel & no meh Tempel

    November 3, 2022 in Cambodia ⋅ ⛅ 20 °C

    Hüt heimer volls Programm mit üsem Seminar gha.

    Mir si am morge nach Angkor Wat gfahre ds isch di grössti Tempel-Aalag vor Welt & mega beidruckend.
    Direkt drna heimer dr Tempel Wat Thom besichtigt. Ou dä isch mega beidruckend gsih abr sehr ähnlech wie dr erst womer hei gseh.

    Nacheme feine Zmittag im Restaurant "Street27" simer grad nomal gane Tempel aluege im Gebiet vo Angkor Wat, dr Ta Prohm Tempel (dert heisi Tomb Raider dräit - drum wird er ou "Tomb Raider Temple" gnennt). Dä isch ufne ganz anderi Art dr Wahnsinn gsih, will dr Urwald dr Tempel quasi het ignoh & ganz viil Böim si über und uf de Muure gwachse, was ganz e mystischi stimmig het generiert.

    Ganz zum Schluss simer ufne Hügel zum über dr ganze Tempelaalag dr Sunneundergang ga agugge.

    Iz simer aller knüttlet vo däm idrucksvolle, spannende & astrengende Tag & si mega froh dsmer chöne ga ligä.    Read more

    See translation
  • Kambodscha via Bangkok

    Gschichte, Emotione u Schlaglöcher

    November 4, 2022 in Cambodia ⋅ ⛅ 30 °C

    Mir heis gmüetlich gno hüt am Morge u si am 10.30 vom Hotel los für i üses Homestay womir die nächste zwöi Nächt wärde verbringe. Der Wäg dahäre isch holpriger gsi aus dänkt. Im wahrsten Sinne des Wortes. Der TukTuk Fahrer het nid gwüsst wos isch u isch eifach mau 15min i die fauschi Richtig gfahre bis mir irgendwenn hei gmerkt dasmir nid richtig si. Drum het d Sophie ihn när glotst. Leider zeigt GoogleMaps weder d Qualität vore "Strass" a no wesi plötzlich eifach ändet wöusi isch abgstürzt. Auso simir wider zrügg über die ca. 700 Schlaglöcher bis de der TukTuk Fahrer ar Frou vom Homestay het aglüte. Schlussemänd ischsi üs mitem Roller ar Houptstrass vore cho abhole.

    Z Homestay macht sowit e guete Idruck. Üsi Nachbare si ca. 20 Krokodil u si hei ganz e härzige Wäupe. Da üsi Reis derthäre chli lenger gange isch aus erwartet heimir nume schnäu z Gepäck abglade u si när gad wider los für izz Haven.

    Dert heimir zersch dörfe i Änglischunterricht ineluege u när heimir der Sokhhoeurn und d Savorn troffe. Si hei im 2017 d Lehr im Haven abgschlosse u si äxtra verbi cho für üs es paar Frage z beantworte. Si hei sehr idrücklich vo sich u irere Gschicht verzeut. Mitder Sara heimir ono lang gredt. Es isch sehr emotional gsi vo dene verschidene Gschichte vode Kambodschaner z ghöre. Izze simir knüttlet düre u machenis wider ufe Wäg zrügg i üses Homestay.    Read more

    See translation
  • Kambodscha via Bangkok
    am Büglä
    Lucky LukeKrokis

    Lucky Luke

    November 5, 2022 in Cambodia ⋅ ⛅ 27 °C

    Nachdä vile Idrück im Haven heimir üs e Tag lang ufz Schribe u verarbeite vode vile Idrück konzentriert. Mir si ir Stadt vo Kafi zu Kafi u hei überau chli dörfe blibe u über ires Wlan a üsere Arbeit schribe. Derzwüsche simir no chli ga lädele u womir i üses Homestay si zrügg cho simir vor Lucky Luke u vode Krokis begrüesst worde. D Lucky Luke heist eso wöu der Bsitzer het gseit är heigi ire Name vergesse u mir heire drum e nöiä gä u ersch nachder Namensgäbig gmerkt dassi es Modi isch. Aber i gloub si isch nid unzfride dermit.Read more

    See translation
  • Kambodscha via Bangkok
    Dä Bueb hetmir vouer Stouz sini Spinnele zeigt. D Sophie u d Fäbs hei weniger Fröid gha...2...aber si isch e liebi gsiEine vode Märkt underwägsGrüentee-Kokos Drink2Produktion vo StickyriceÜses fürnäme Hüttlies scharfs Schoggimuss

    Luxustourismus vs Realität

    November 6, 2022 in Cambodia ⋅ ☁️ 25 °C

    Hüt simir der ganz Tag underwägs gsi. Am Morge simir in Siem Reap abghout u mitemne Büsli iz Farmhouse Smiling Gecko gfahre worde. Mir heis sehr guet breicht mktem Fahrer. är het underwägs viu vom Land u vode Lüt verzeut u mir heine chönne frage wasnis gad so isch igfaue. Är hetnis Märkt ufem Land zeigt, iri verschidene Brüch erklärt u zeigt wiesi Stickyrice härsteue. Insgesammt simir öppe 7 Stund underwägs gsi bismir düreghocket im Farmhouse si acho. Dert simir ufne Teil vor Klass gstosse wo Smiling Gecko aus Projekt het. Das isch o e Schwizer wos het iz Läbegruefe u izze dä Lüt dert e Schuel u Arbeitsplätz bietet. Näbder Residänz heisi e Hüenerfarm, düe diversi Sache apflanze u biete Toure für Touriste a. Im Verglich zu üsem Homestay vorhär füelemir üs hie gad wie imene Luxusresort was ou nid ganz fautsch isch mir hei e Hütte für üs 3 mitemne Bad so gross wie üsi Stube u ere freistehende Badwanne. Nachemne leckere Znacht gömir erschöpft ga lige dasmir Morn wider Sitzläder hei füre nächst Transfer.Read more

    See translation
  • Kambodscha via Bangkok
    GägäsätzPreaek tuek chhu riverWaterfestival

    Nome Transfer u intresannti Riiserad

    November 7, 2022 in Cambodia ⋅ ☁️ 30 °C

    Hüt am Morge simir im Smiling Gecko izz Yoga. Das het sehr guet ta när hei mir üse Transfer Nr. 2 hindernis bracht. Dasmau simir i ca. 3,5h düre gsi. In Kampot acho simir afamau chli verchlüpft abem Lamborghini vor üsem Hotel. Es hetsich aber de usegsteut dases nid so dekadänt isch wie z Outo. Nachdäm mir nomau a üsem Projekt hei gschaffet simir widervereint aus ganzi Klass ga Znachtässe u speter no az Waterfestival. Das isch es Volksfest in Kambodscha u es het wahnsinnig viu Lüt. Spannend isch dasmir fasch die einzige Touris si gsi am Festival. Dämentsprächend simir ufgfaue u sogar mehrfach vo Iheimische gföttelet worde. Z Riiserad isch o es Erläbniss gsi. Mir heis eifach nid z gnau dörfe aluege wöu je me dä hesch häregluegt desdo me Rost u Kabelbinder hesch gsee aber mir si aui wider ganz a Bode cho.Read more

    See translation
  • Kambodscha via Bangkok

    Some Work & e Guide namens Tuch

    November 8, 2022 in Cambodia ⋅ ⛅ 31 °C

    Hüt am Morge heimer eis nochli drhinder müesse mit üsere Arbeit & de Vorbereitige für üsi Präsentation morn.

    Ume Mittag ume heimers du de chli gseh gha u drum het e grossteil vor Klass beschlosse e Pfäfferplantage ga azluege.
    Üse Driver het di "bumpy road" mit Bravour gmeisteret & när simer ir Plantage "La Plantation" wo vome Belgier und sire französische Frou gfüehrt wird, acho.

    Mir hei zersch es mega feins Zmittag becho & drna no e super spannendi Füehrig über d Plantage becho. Üse Guide het Tuch gheisse wasme "Tuc" usspricht & het üs mega viil spannends z verzelle gha & ou no ganz früsche Pfäffer direkt ab dr Pflanze chöne teste. Zum Abschluss hets no es Tasting gä vo all dene Spices wo si verchoufe & mir hei natürlech ono biz ikouft.

    Womer dahei si gsih, isch scho rächt spät gsih u drum simer relativ bald emal ga Znachtässe. Es het indisch gä & isch mega fein gsih!    Read more

    See translation
  • Kambodscha via Bangkok

    (fasch) gschafft

    November 9, 2022 in Cambodia ⋅ ⛅ 30 °C

    Mir heis gschafft! oder ömu fasch. Hüt am haubi3 heimir Präsis vo üsne Projekt gha womir ide letste Täg hei bearbeitet. Vorhär heimir no ade Seminarpapier gschribe u d Präsentatione vorbereitet. Es isch sehr interesannt gsi i die Projekt vode andere Gruppe inezlose. Izze fäut numeno der Finschliff vor Arbeit u der Mediebitrag när chöimkr es witers Hägli setzt vo däm Studium.
    Zum offizielle Abschluss vom Seminar simir nachde Präsis aus ganzi Klass ufemne Bot ga Znacht ässe, hei zeme agstose, der Sunneuntergang gnosse u Glüewürmli beobachtet. Das isch e glungene Abschluss gsi für das Seminar u izze fröie mir üs aui ufd Insle u äntlich ar Meer!    Read more

    See translation
  • Kambodscha via Bangkok

    Dr Wäg ids Paradies isch holprig

    November 10, 2022 in Cambodia ⋅ ⛅ 29 °C

    Iz wo üses Seminar ferti isch gä es paar zäme zersch no uf Koh Rong Samloem u ines paar Täg de no witter uf Koh Rong.

    Hüt am 9ii simer drum vomene Bus bim
    Hotel abgholt worde wo üs uf Sihanoukville hätti sölle bringe. Scho bim istige heimer gfunde er schmöcki chli gspässig abr mir si du glich no fasch 3h über holprigi Strasse gfahre bis ds dä Bus überhitzt het u mier churz vor Sihanoukville inere Rouchwulche si abgläge. Mir hei Glück gha und dr Reiseagent hetnis gad öppe 20 Minute später e Car gschickt wonis di letschte 30 Minute id Stadt het gfahre wo mier du ändlech hei chöne z Boot nach Koh Rong Samloem nä.
    Abr o das isch e holprigi Sach gsih u nid alli heis mega cool gfunde (ou will Reisechrankheit es Thema isch gsih) abr nach öppe 45' simer im Paradies acho!

    Koh Rong Samloem gseht chli us wi ir Karibik mit wunderschöne wisse Stränd.
    Ou üses Hotel isch mega, direkt am Strand miteme infinity pool - eifach dr Hammer!

    Dr Räst vom Tag hei mir mit Ässe, Ligge, Bädele und Läse verbracht.
    Iz gömer de no ga Znachtässe & freue üs druf morn dr ganz Tag chönne z entspanne.    Read more

    See translation
  • Kambodscha via Bangkok

    e Strandtag in Paradies

    November 11, 2022 in Cambodia ⋅ ☁️ 29 °C

    Hüt a üsem erste offizielle Ferietag hei mir vorallem dr Ligistuel u dr Pool gnutzt u gsünnelet, bädelet, gläse u plöiderlet.
    Es isch für aui mega wichtig gsih iz afa chli chöne uszspanne nach dem Seminar & de letschte Mönet wo rächt sträng si gsih.

    Es paar si no ufne Strandspaziergang gange & hei no Diving- & Schnorcheltrip für morn buechet.
    Wasnis isch ufgfalle, isch ds zwar vor üsem Resort dr Strand rächt suber isch, abr schüsch hets überall mega viil Küder.

    Iz düemer fridlech am Strand (mit de Füess im Sand) Znachtässe und drna giz no e Rundi UNO bevor dsmer gö ga lige dsmer morn fit si für Touche u Schnorchle.    Read more

    See translation
  • Kambodscha via Bangkok
    31🔊 D Grille im Resort si wahnsinnig usdurend1UNO! Jede het sini eigete Regle...

    Qualle...Oktopus...UNO!

    November 12, 2022 in Cambodia ⋅ ⛅ 29 °C

    Vorgester am Abe heimir ire Bar der Denis aquatscht wöuer es T-Shirt vore Touchschuel het annegha. Är isch vo München u schaffet bire Touchschuel öppe 500m vo üsem Resort entfernt. So hetssich ergeh dasmir hüt am Morge am 9i si gstartet. 4 vo üs zum Touche u der Räste isch mitcho zum ga Schnorchle. D Kelly het gfunde: "I touche nid so gärn wöu i nid gärn schnufe under Wasser." Das chani irgendwie nachevouzie. I ha no e churze Reefresher gmacht u hami gad wider müesse az Gfüeu gwöhne under Wasser z schnufe. Woni wider chli bi drinne gsi heimir 2 Touchgäng gmacht a verschidene Spots. Näbe wunderschöne Fischschwärm heimir e Oktopus, e feiechli grossi Qualle u no ganz viu anderi grösseri u chlineri Gstaute chönne bestune. Die Underwasserwäut hetmi widermau fasziniert. Die Tier näme eim i irem Läbensrum uf aus wäremir e Teil dervo. Ke Huch vo Angst oder Abwehr. Sehr beidruckend. D Schnorchler hei aues vo chli witerobe beobachtet. Zwüschem erste u em zwöite Touch-/ Schnorchelgang hets es Vegicurry Zmittag geh. Z Buttele vom Schiff hei leider nid aui glich guet verlitte aber mir hei ohni gröberi Zwüschefäll öppe so gägdie 3 wider feste Bode underde Füess gha.

    Der Räste vom Nami heimir aui d Nase ines Buech gsteckt. Am Abe heimir üs när, dankem strömende Räge, fürz Znacht im Reesort entschide u nachdäm mir üs ÄNTLICH si einig gsi öbme ufnes +2 es +4 darf druflege und under welne Umständ dasme darf drischiesse u öbme überhoupt darf drischiesse heimit tatsächlich no feiechli e lustige Spiliabe gha.    Read more

    See translation
  • Kambodscha via Bangkok
    Sunneundergang am Lazy BeachSunneufgang vor üsem Resort

    Lazy People at Lazy Beach

    November 13, 2022 in Cambodia ⋅ ⛅ 29 °C

    Wisech ds fürne Sunnti kört heimers ganz gmüetlech la agah. Am Morge si es paar vo üs zwar früeh uf füre Sunneufgang zluege abr mir si drna när nomal es stündli ga ablige.

    Nachem Zmorge heimer dr Vormittag am Pool verbracht & am Nami heimer glich nochli meh vo dr Insle welle gseh u si 20 Minute uf di anderi Sitte vor Insle zum "Lazy Beach" glüffe. Uf dere Sitte vor Insle isch ds Wasser no klarer gsih will d Strömig nid vo dere Sitte chunnt & mir si nomal churz ga schnorchle & bade.
    Mir hei dert o usegfunde was ds eim im Wasser mengisch sochli brönnt obwohl eim nüd berüert - es isch also Plankton.

    Es het am spätere Nami nach Gwitter usgseh u vom übereloufe düre Urwald simer aller verschwitzt u grusig gsih u drum simer de wieder hei gspatziert u ga dusche u ner vorem Znacht no biz abgläge odr mit de Lüt ir Schwiiz telefoniert.
    Usserd Kelly u d Maylea. Die si am Lazy Beach blibe u hei no der Sunneundergang gluegt. (Z Gwitter hetsich verzoge u aui si troche blibe)

    O hüt hets vor und nachem Znacht wieder spileni gä, wo abr disesmal ohni grossi Diskussione hei chöne gspillt wärde ;).    Read more

    See translation
  • Kambodscha via Bangkok
    Es ich chli witer u töifer gsi aus erwartetPowerPoint Karaoke

    Mitder Nussschale düre Golf vo Thailand

    November 14, 2022 in Cambodia ⋅ 🌧 29 °C

    Hüt heimir (fasch) z letste Mau d Underkunft gwächslet. Vorhär heimir der Morge no am Pool verbracht u d Sunne gnosse. Am 1 heimir när üse Transfer gha vo Koh Rong Sanloem uf die grösseri Insle Koh Rong. Z Transferboot isch izz nid wahnsinnig vertrouenserweckend gsi aber es het si Job ömu ta. Der Wäg vom Land zum Boot hei o nid aui glich bestritte. Die meiste heisich fürz chline Böötli entschide wonis zum grössere het bracht u anderi si mit Sack u Pack dürz Meer gwaatet u diräkt zum grössere Boot. Me oder weniger nass simir ömu am Schluss aui i dere Schale ghocket u si nach öppe eire Stund über grösseri u chlinneri Wäue bi üsem Treehouse acho. Chum heimir icheckt gha het de z Wätter o gchert u es het feiechli abegla. Guet simir vorem Gwitter a Land gai. Nachere Rundi PowerPoint Karaoke (Mi hautet e Vortrag u kennt weder d PowerPointPräsentation no z Thema u mues improvisiere) heimir im Restaurant vo üsere Residänz Znacht gässe u z erstemau würcklich e gueti Pizza übercho. Derzwüsche heimir no Stadt-Land-Fluss gspiut. Izze ligemir schowider aui im Bett u si nache fürz Pfuuse.Read more

    See translation
  • Kambodscha via Bangkok
    12

    Find Penguins? Find Nicola!

    November 15, 2022 in Cambodia ⋅ ⛅ 30 °C

    Am erste Tag uf Koh Rong heimer üs bim Zmorge mitere usfüehrleche Rundi "Ufsteller und Ufreger vom Monet" à la Podcast "die Sprechstunde" & de Affli zueluege chli versumet u si drum ersch gäge Mittag zue zum "The Nest" gange (d Beachbar öppe 5 Minute vo üsm Hotel furt).
    Dert heimer i wunderschön klarem u badwannewarmem Wasser bädelet und gsünnelet. Es het o wahnsinnig härzegi Hünd gha, wo üsi tierliebe Härz fasch zum schmelze hei bracht!
    Nachem Zmittag heimer per Zuefall dr Nicola atroffe wo ou us dr Schwiiz chunnt und no uf dr Suechi nachere Underkunft isch gsih.
    Nacheme churze Gspräch heimer trotz dr Warning vo üsem Schuelleiter (don't talk to strangers) gfunde, dr Nicola chönn ja bi üs pfuse, mir hei sowieso zwü 4er-Zimmer und si sibe Lüt.
    Also heimerne churzerhand mitgno & nachdem er iquartiert isch gsih und mir aller duschet hei simer no zum "Kaoh Touch Beach" ga Souvenirs & Snacks füre Usflug vo morn choufe & ga Znachtässe. O dert hets ganz e schnüsige Baby-Hund gha, womer also fasch hei welle mit id Schwiz nä.
    Mir hei o wieder emal gmerkt ds älwä die Nudelsuppe für 2$ eifach di feinste si.

    Iz simer aller so chnüttu dsmer d Gsellschaftsspiili für hüt hei ussegla & scho im Bett lige.
    Drum ize scho - Guednacht!    Read more

    See translation
  • Kambodscha via Bangkok

    Wiisi Sandstränd u widerspänstigi Roller

    November 16, 2022 in Cambodia ⋅ ⛅ 29 °C

    Für chli öppis vor Insle z gsee heimir üs hüt 4 Roller gmietet. Sicherheit wird hie chli anders definiert drum heimir weder e Prüefig no e Heum brucht. Am Afang heimir chli Startschwirikeite gha. Z Fahre im Sand isch nid ganz eifach gsi aber nachem überquere vom erste Strand simir när ufere feiechli guete Strass glandet. Nach es paar Kilometer simir de am Long Beach glandet. I gloub i ha i mim Läbe nonie sone schöne Strand gsee. Z Wasser isch wahnsinnig klar u der Sand fasch schneewiis gsi. Dert heimir chli badet u si chli gsy. När simir witter iz Golden Beach Resort ga Zmittag esse. Nachem Zmittag heimir üs no ufd Suechi nachem Wasserfall gmacht. Der Wäg isch e mebesseri Lücke im Urwald gsi u der Bach isch me es Rinnsaal gsi aus e Bach. Drum heimir üs dergägä entschide zum Wasserfall ufe z chlättere. Derfür hetme vo dert us e schöni Ussicht ufz chline Fischerdörfli gha. Nach däm Usflügli heimir üs mit üsne Roller wider ufe Rückwäg gmacht. Nachdäm mir aui (fasch) ganz si zu üsne Bungalows zrügg chi heimir nomau e Rundi Stadt-Land-Fluss gspiut u es PowerPointKaraoke gmacht.Read more

    See translation
  • Kambodscha via Bangkok

    Letschte Inseltag

    November 17, 2022 in Cambodia ⋅ ⛅ 29 °C

    Mir hei a üsem letschte Tag am Meer dr Sunneufgang welle ga luege, aber es paar hei dr Wecker verschlafe. Die wo uf si, hei dr Sunneufgang aber ou nid ganz gseh, wills rächt bewölkt isch gsih - aber es hetsech für di rot lüchtende Wulche trotzdäm glohnt.
    Dür das dsmer när nomal si ga lige simer ersch rächt spät ga zmörgele u hei beschlosse dsmer e Strandtag mache. Es isch du de eher e Zimmertag worde, das fasch dr ganz Tag immer wieder het grägnet u blitznet u donneret.
    Wimesechs vo üs afa gwohnt isch heimer no dr Elmo us Finnland im einte Zimmer ufgno damit är nid allei im Räge mues uf si Transfer warte.
    Am Aabe heimer gfunde mir welle zur Feier üses letschte Tags nomal zur "The Nest Beachbar" u heinis dert es wunderbars Znacht und ono e rundi Shots gönnt.
    Mir heis abr ruhig la agah und si nid zspät düre urwald wieder hei, da mir morn wieder mitem Boot ufs Festland müesse und üs ufe Wäg id Houptstadt Phnom Penh mache wo üsi Reis de am Samstig mitem Heimflug id Schwiiz ändet.    Read more

    See translation
  • Kambodscha via Bangkok

    E endlose Transfer i di grossi Stadt

    November 18, 2022 in Cambodia ⋅ ☁️ 27 °C

    Hüt isch üse Transfertag zrügg id Houptstadt Phnom Penh gsih, wo mier no ei Tag verbringe bevor dsmer de morn em Aabe üse Rückflug id Schwiiz aträtte.
    Mir hei dä gad im Hotel uf Koh Rong chöne bueche u si hei sogar üses Gepäck zur Ferry transportiert.
    D Ferry isch us mire Sicht (i wirde mega schnell seechrank) di besti Bootsfahrt gsih womer i üsere Zyt in Asie hei gmacht.
    Vo Sihanoukville us heimer när e chliine Bus gha wonis (dank em neue Highway) i öppe 3-4h uf Phnom Penh hätti sölle bringe.
    Will aber in Kambodscha meistens nid alles ganz so klappet wime sech ds vorstellt het üs dä Bus zersch nid rächtzytig abgholt u isch när tatsächlech nid uf dä Highway sondern alles uf dr alte Strass gfahre.
    Es het ou no anderi Lüt i däm Bus gha u eine het e stinkige Fisch ime Plastiksack i Kofferreruum glade - es isch also oscho eis komfortabler gsih.
    Will dä stinkig Bus mit üs nid ufe Highway isch, het di ganzi Reis dopplet so lang duuret, u womer ändlech in Phnom Penh si acho hett dä Driver üs eifach irgendwo ir Stadt welle uslade. Nacheme liecht bissige Telefonat mit dere Frou wo dä Transfer koordiniert het, heimerse du glich no chöne überzüge üs bim Hotel uszlade und öppe 19:30 Uhr heimers de gschafft gha.
    Da üses Hotel es Restaurant und e Pool uf dr Dachterrasse het heimernis churzerhand entschlosse derte zZnachtässe & es paar hei nos schnell e Schwumm gno.
    Iz simer aller mega müed & freue üs sehr für ga zdusche und is Bett.    Read more

    See translation
  • Kambodscha via Bangkok
    S-21
    1Ide Geböide inne hetme nid dörfe Föttele aber ou der Innehof het viu grousami Gschichte verzeutE Maler womir ufde Strasse vo Phnom Penh hei atroffe

    Ä happige Abschid

    November 19, 2022 in Cambodia ⋅ ☁️ 23 °C

    Da üse Flug Hüt ersch am 9i am Abe geit heimir am Morge nochli Zit gha fürne Schnäudurchgang dür Phnom Penh. Scho vor dere Reis simir üs einig gsi, dasmir z Genozidmuseeum wei ga aluege. Drum heimir üs nachemne mässig guete Zmorgebuffet so umdie haubi10ni ufe Wäg gmacht. Mit 2 TukTuks simir düre Grossstadtvercher zum Museeum gfahre u hei dert e Audioguide gno füre Rundgang.
    Das Museeum isch ä happige Brocke. Es isch ide Rümlichkeite vom Gfängniss S-21. Hie si im Chrieg vode Rote Khmer ide 1970er Jahr bis zu 20'000 Männer, Froue u Ching uf brutalsti Art und Wis zu Zwangsgeständniss gfolteret u när ermordet worde. Bis Hüt weisme vo nid me aus 12 Überläbende. D Stimme vode damalige Folterer und vode wenige Überläbende, d Angst ide Ouge vode Gfangene ufde Fotos wo vor weniger aus 50 Jahr gmacht worde si, d original Foltergrät und d Überräste vode Tote wärde üs aune no lang düre Chopf ga.
    Mitere eher bedrückte Stimmig simir nachdäm Rundgang öppis ga Zmittag esse u när wider zrügg izz Hotel womir dankder Grosszügigkeit vom Hotel üses Gepäck hei dörfe la u am Nami no der Pool u e Duschi bruche. Es paari vo üs heisich no e letsti priiswärti Massage gönnt .
    Am 6i ischnis när üse Flughafetransfer cho abhole u mir hei üsi Heimreis aträtte.    Read more

    See translation
  • Kambodscha via Bangkok

    ds Abentüür ändet abentürlech

    November 20, 2022 in Switzerland ⋅ ⛅ 8 °C

    Üsi Heireis het wi im letsche Biitrag erwähnt, mitem Transfer a Flughafe gstartet. Dert isch z Chaos scho z erste Mal losgange will lut üsem Fahrer dr chinesisch Präsident ir Stadt isch u dä mit sim Konvoi mega lang e Strass het blockiert. (Mir si schono chli beidruckt gsih ds dä älwä di ganzi Polizei vo Phnom Penh i Gebruch gno het).
    Usserdem isch no Fyrabevercher gsih u drum het dä Transfer 1.5h statt 30min duret.
    Am Flughafe hets zum ichecke e riisegi Schlange gha, wosech 10Minute lang ke Meter het bewegt, also heimer churzerhand no z Online-Check-In übers Handy gmacht u hei numeno müesse ga zGepäck abgä.
    Ner simer genau pünktlech am Gate acho, aber dert het scho z nächste Hindernis uf üs gwartet; Üse Flug vo Phnom Penh nach Bangkok het 2h Verspätig ka. Da mir ufe Aschlussflug id Schwiiz si agwise gsih, willmer am Mäntig aller wieder müesse ga schaffe, si mer liecht i Stress cho, womer hei realisiert dsmer z Bangkok numeno 30min zum umstige hei.
    Also simer um üses Läbe dür dä Flughafe grennt (hei o nomal dürd Sicherheitskontrolle müesse) u heis aller zäme ufe Flug nach Zürich gschafft.
    Scho dert heimer dänkt, ds üses Gepäck älwä nid glich fest pressiert het.
    Womer hüt Morge z Zürich si acho hetsech dä Verdacht natürlech bewahrheitet, (ou wemer natürlech zersch no mitem letschte bizeli Hoffnig si am Gepäckband gstande), aller üsi grosse Ufgabe-Gepäckstück si z Bangkok blibe. Also simer aller no ga ds "Delayed-Luggage-Formular" usfülle, u iz düemer halt hüt nid wäsche & usrume. Mir si aber aller rächt entspannt, will niemer öppis läbeswichtigs im Koffer het & mir ja wüsse wo ds ds Gepäck isch unds de i paar Tag zu üs heiglieferet wird.

    Mir si iz aller zäme ufm Heimwäg & löh di vile schööne, emotionale, idrückleche, gmüetleche, tolle und weniger tolle Momente vo de letschte 3.5 Wuche i üsne Chöpf la Revue passiere.

    Mercii heit ier üsi Reis mitverfolgt, mir hoffe es het euch ou gfalle & dir düet üsi nächste Reise ou wieder mitverfolge.

    leahaey & saum arkoun (tschüss und danke!)

    Maylea & Fäbs    Read more

    See translation
    Trip end
    November 20, 2022
  • 2026© FindPenguins
  • Home
  • About us
  • Group Tracking
  • Press
  • Terms
  • Privacy Policy & Cookies
  • Help Center
  • Legal notice