Great Ocean Road

Sitem letschtä Iitrag si scho wieder äs paar Täg vergangä u mir hei währenddessä sehr viu dörfä erläbä u gseh a dr Great Ocean Road. Letscht Donnschtig si mir vo Melbourne uf Torquay gfahrä, wo dr Start vor Great Ocean Road gsi isch. Grad am Fritig hei mir üsi 1. Surflektion 🏄🏼‍♀️🏄🏻 gha. Währenddäm dr Christian scho fasch äs Naturtalänt isch us sogar äs paar mau gschafft het ufzstah, isches bi mir eher hoffnigslos gsi 😅.

Am Samschtig si mir wiiter dr Küschtä entlang gfahrä u zu diversä Stränd gsi gah luegä, zumänä Lüüchtturm gangä u hei ä Walk zumänä Wasserfau gmacht. Am Sunntig si mir i Otway Nationalpark gangä, dr cheutischt Rägäwaud. Dert isches grad knapp 13°C gsi 🥶, trotzdäm hei mir dr Treetop Walk gmacht, was sehr faszinierend gsi isch.
Am Mändig si mir zersch wieder ä churzä Walk im Rägäwaud gah machä (hüt isches ä chli wermer gsi aus am Vortag) u när zum nächschtä Lüüchtturm gfahrä, wo ir nechi o di nächscht Ungerkunft gsi isch. Bereits ufem Wäg dert härä hei mir di erschtä Koalas entdeckt. Bir Ungerkunft, ä Campingplatz, hets tatsächlich o Koalas gha wo uf dä Böim ghocket si 😍 Abem Dsischtig isches när sehr interessant wordä, mir si nämlich zu dä bekanntä 12 Apostles cho. Di Gägend mit denä ganzä Felsänä u Klippenä isch sehr iidrücklich gsi u het üs persönlich super gfauä. Am Aabä nachem zNacht si mir sogar nu zmitts im Dorf arä Schlangä🐍 begägnet, wo am Nachbuur überä Rasä gschlänglet isch 😁
Hüt hei mir nu mau bines paar verschiednigä, schönä Lookouts ghautä 😃 Leider isch d Great Ocean Road ab hiä aber scho wieder fertig.

Üs hets super gfauä, vorauem dr zwöit Teil. Dr Nachteil isch aber, dass es drum so viu Föteli gäh het, dasses extrem schwierig gsi isch, sich für z entscheidä weli ufäzladä 😅Read more