Kangaroo Island

Geschter Morgä si mir scho am 7ni abgfahrä richtig Cape Jervis, wo mir d Fähri für uf Kangaroo Island gnu hei. Ungerwägs dert härä hei mir mega viu Kangaroos 🦘 u wieder ä Hirsch🦌 gseh gha.
Nachem iicheckä z Cape Jervis isches o scho los gangä mit iistiigä. Währenddäm i gmüetlich mit angernä Passagier ha chönnä druf loufä, het dr Christian z Outo hingerzi müessä druf fahrä. U anschiinend sigs rächt äng gsi.

Nach 45 Minutä si mir o scho z Kangaroo Island aacho, wo mir grad diräkt ufä Prospect Hill ufägloffä si. Vo dert het mä ä hammer Ussicht ufd Gägend gha 😃
Wiiter si mir zur Seal Bay gangä, wo mir ganz viu Seelöiä🦭 gseh hei. Mir heis grad super breicht u äs het mega viu jungi gha 😍
När si mir i Flinders Chase Nationalpark gangä. Dert si mir us erschts zum Weirs Lookout gangä, vo wo us mä ä super Usblick überd Küschtä gha het. När isches zum Cape Du Couedic Lighthouse gangä. Ä wunderschönä Lüüchtturm 😃. Chli wiiter unger isch nu dr Admirals Arch gsi, das isch ä riesigä Torbogä vou ir Klippä inn. Dert hei mir das mau mega viu Seehüng gseh gha u mir tatsächlich grad 2nä chönnä bim kämpfä zuäluegä. Us letschtä Stopp si mir nu zu dä Remarkable Rocks gangä, diä hei üs o mega fasziniert.

Hüt morgä si mir mau zersch zur Emu Bay Lavender Farm gfahrä gah z Mörgelä. Mir hei äs Granola Müesli mit Lavendel probiert u das isch erstuunlicherwiis super guet gsi 😋
Nach derä sterchig hei mir üs ufä Wäg id Little Sahara gmacht, wo mir mau Sandboarding und Tobogganing usprobiert hei. Obwouh mä när vou Sand gsi isch (u zwar würk überau 😅) isches dr hammer u mega luschtig gsi 😂 U mir hei nu das Glück gha u hei dörfä ä grossä Waran gseh 😃
Bevors wieder zrüg ufd Fähri isch, si mir nu schnäu zum Cape Willoughby Lighthouse gangä gah luegä. Leider hei mir aber nid weiss nid wiviu Zyt gha, wüu si dert grad hei wöuä zuä machä. Aber was mir gseh hei, isch schön gsi.
Trotz Verspätig u chli Wällägang ungerwägs, si mir am Aabä wieder z Cape Jervis aacho u hei üs ufä Wäg richtig Adelaide gmacht, wo mir di nächschtä Täg wärdä verbringä 😊Read more