Markha Valley Tag 3

Nach dem mir üs am Morge mit Schwarztee und Chapatis gstärkt hei si mir los gange uf die hütige Etappe :) Meh aus 21 km quer durch zMarkha-Valley und 12km bis zum nächste Ort, wo mir gfilterets Wasser becho hei... Scho ide erschte Pousä hei mir när aber gmerkt, dass Schwarztee zum Wandere eigentlich sogar no relativ fein isch.

Dä Wäg nach Sahra isch leider aues uf ere meh oder weniger guet befahrene Strass gsi - dUssicht hett aber ou dert nid entüscht. Uf de letschte 9km hei mir üs de Wäg den regelmässig mit Maultier, Esel und Rösser teilt. Natürlich hei mir ou hüt wieder zeinte oder andere Mal de Fluss müesse überquere, mängisch über Brücke oder Boumstämm, mängisch eifach ide Schuh und einisch ou ziemlich töif dür zWasser. Bi dene Tempersture und em strahlende Sunneschin isch das aber willkommeni Abkühlig gsi.

Nachem letschtä Ufstieg, wo üs aui nomau mögge het - die letschti Pousä sött me eifach nid striche - hei mir när Homestay in Markha erreicht. Näbärä schöne Ussicht, Milktea und Güetzli wärde mir - we mirs richtig verstande hei- sogar mit Momos belohnt 😍

Nachtrag: Nach ere chline Pousä hei mir denn doch no dEnergie gfunde uf Entdeckigstour zgo und dRuine vo Markha zerklimme... Danach hetts tatsächlich Momos gä und hüt isch für einisch klare Himmel gsi und so hei mir no ne Haubstund chönne useliege und ⭐ inklusive 🌠 luege :)Read more