Yurutse uf Skyu

Am Morge heimer am 7ni Zmorge übercho und sogar d Meret het 2 Chapatis gässe...
Usem Dorf use isches die erste 4km stetig ufe gange zum Gandala Pass und 4900m. Jede i sim eigete Tempo heimers alli in öppe 3h ufe gschafft und hei churz die schöni Ussicht gnosse. Bevor das mir kalt hei übercho simer de witer gloffe. Scho fies wie viu schneller me bim abeloufe isch als bim Ufstig. Üsi Mittagspouse heimer de in Shingo gmacht. Im Lunchpäckli womer am morge übercho hei hets e Ei, e Härdöpfel, 2 Chapatis, es paar Guetzli und e Fruchtsaft gha. D Noémie und d Meret si nid grad begeistert gsi und drum hets de chli meh für mi gä 😅
Bevor das mir de si witer gloffe hets die erste Blasenpflaster brucht und denn isches witer gange. Nachem Zmittag heimer no ca. 8km vor üs gha aber dasmal alles am Fluss entlang bis üses Tal is Markha Tal abbiegt. Ds Tal isch immer schmaler worde und mir si üs vorcho als würde mir im Grand Canyon unterwägs si. Nid das öpper vo üs scho mal dört wär gsi aber so stelle mirs üs vor 🙈
Ds Endziel vo hüt isch Skyu gsi und wöu me hie sogar mitem Auto chönnt härefahre heimer scho chli öppis grössers erwartet. Und tatsächlich hets scho grad am Afang vom Dorf es Kafi gha mit 2Lüt dinne und grad nachdem mir am Kloster verbi si hets sogar e Krüzig gha.
D Homestays düe ihri Gäst nacheme Rotationsverfahre verteile und mir hei d Wahl gha zwüsche eim wo 6 min I die entgägegsetzti Richtig vo morn isch aber mit Duschi oder es anders 2min I die richtigi Richtig aber ohni Duschi. Ohni lang überlege hei mir üs für das ohni Duschi entschide mir füehle üs wahrschinlich no nid gnueg stinkend 😂. Ds Homestay isch ou viu kleiner als das vo gester und die Frou cha keis Wort Englisch aber für d Ziit vom Znacht hei mir üs gloubs verstande und alles andere bringe mir mit Zeichesprach ou no irgendwie häre!
Nachtrag: sie isch zwar mega nett und hilfsbereit aber ihres deheime brücht no e Wasserfilter. Vorem Znacht heimer üs im Dorf no uf d Suechi nach Wasser gmacht. Im Kafi hei mir dürs Fenster gseh dases eine hät aber es isch leider zue gsi. Nachem Znacht heimers no gschafft üsi Fläsche mit Schwarztee zfülle aber niemer vo üs het gärn Schwarztee.
Am 20 vor 9ni heimers de is Bett gschafft. D Meret und ich hei direkt d'Option Schlafsack gwählt. Nach 5min unter de Decki het denn o d Noémie I Schlafsack gwächslet 🦗🐜
Fazit vo de Meret vo au däne Sache wo me sich hie chönnt ifah hätt si scho am liebste d Lüüs 😂Read more