Los Angeles

Die Stadt der Engel 👼🏼

Am Samstig simmer voller Vorfreud uf e entspannte Beachtag richtig Malibu gfahre. Leider isch de Näbu ou mit üs greist. Mir hei aber inzwüsche usegfunde, dass das Wätterphänomen i dere Jahreszit normau isch, wöus s Landesinnere so duet ufheize und de Pazifik so chaut isch, böudet sich Näbu ade Küste/am Meer. Das het üs aber nid devo abghaute üses Tüechli am Strand z platziere und s Füdli is Wasser zha (Luisa). Nach üsem Beachday hemmer no d Duschi i üsem Camper - mir heine eRVin touft🚍😂🤓 - igweiht und hei üs füre Venice Beach parad gmacht. Uf de Suechi nachemene Parkplatz simmer mit üsem eRVin ufem Boulevard zmitzt i flanierende Strandbsuechende glandet. Chli stressig gse, aber nur chli (siehe Video😂). Die skatende LA-Lüt hei üs aber sehr beidruckt und s Ässe bim MAO‘s Kitchen isch s günstigste und s grösschte gse bis itze😍.

Churz vor knapp simmer im Dunkle uf üsem Hollywood Camping acho - wow, üs gfauts da! Am Sunntig simmer früeh ufbroche und hei ide Houptattraktione vo Hollywood/Beverly Hills und Santa Monica mitem HopponHoppoff e Bsuech abgstattet. D Chanti und d Nädle hei sogar de Rollercoaster ufem Pier usprobiert (siehe Foto). Vom Sightseeing hemmer durst übercho und üs drum es Getränk ufere Rooftopbar gönnt - definitiv üses türste Bier ever(40$ für aui😂). De usblick isch defür gratis, aber unbezahlbar gsi (Hollywood glam). 🤩

Nach däm luxus isches wieder zrugg is glamcamp gange, wo üs s autägleche läbe wieder ighout het mit wäsche, choche, abwäsche, zmorge parad mache, ufruume und so wyter. 🧹🧼🪣Read more