No 1 Tag Trujillo

Hüt hemmer wieder usgschlaffe. Geg die 10ni sommer mal id Gmeinschaftschuchi go Zmorge esse. Hüt hetts Avocado-Cracker geh mit Tomate. Mir mönds vielmeh wertschötze, dass mer da ohni schlechts Gwüsse feini und au günstigu Avocados 🥑 bechunt. Mir hend denn eusi Thermofläschene mit Buillon gfüllt. Was eh sehr nice Idee gsi isch, will de ganz Tag chli a Buillon sippe echt nice isch. Euse Host het üs denn erchlärt wie mer mit de ÖV ah d‘ Huacas (Tempel) Luna y Sol chunt. Doch wo mer denn ah de Busstation gstande sind, isch nie en grosse gelb-grüene Bus gfahre so wie er eus erchlärt hett. Nur so chlini Kombis wo susch scho maximal überfüllt sind. Mir hends denn glich mal miteme grüene Bus probiert, aber glii gmärkt, dass de nid ih die richtig Richtig fahrt. Also simmer denn glich ih so en Kombi gstiige, wo die einte au scho gstande sind wills kei Platz meh gha het. Mir hend de Ihkassierer au gfröged, öb de würklich hu de Huacas fahrt. Plötzlich rüehrt er eus am Strasserand use, wo eh Abzwiigig mit em Schild: Huacas 5km gsi isch. 🤦🏻‍♀️ Denn simmer halt losgloffe. Glii het ps aber wieder sones Tuc-Tuc-Taxi ufglese. Aber au das usch ganz komisch det ahnegfahre und mir sind denn irgendwo mal usegsprunge. Mir hend die Tempel denn vo wiitem gseh und sind denn eifach mal quer dur die Wüesti gloffe. Mir sind denn relativ nid richtig uf die Weg cho, wo mer eigentlich nur mit Guides cha druf. Upps. Hend die Huacas chli bestuunt und sind denn nacher na uf richtigem Weg is Muesum über die Tempel und d‘Moche-Kultur. Zrugg simmer denn vo Afang ah ih de richtig Bus / Kombi gstiige. Nacher simmer nochli durs Städli gloffe und hend neumeds en Kaffi gnoh, wo au eh Schwiizerin scho drin gsesse isch. Z‘Nacht hemmer bim italiener Al Dente gesse. S‘Esse isch seehr geil gsi. Sogar Pasta isch Homemade gsi. Au dementsprechend tür (umgrechnet 24CHF). Aber gliich dopplet so tür wie eusi letzt Unterkunft😂 Nacher simmer zrugg is Hostel und hend eus ready für die nögsti Nacht-Busfahrt gmacht. Am 9ni simmer mitem Movilbus uf Huaraz gfahre. 7h fahrt wartet uf eus. Dasmal hemmer aber 1 Klass glöst, was trotzdem nur 30CHF für eus beidi kostet. Hoffentlich chömmer guet schlafe. 🚌Read more