Ab id Berge - Huaraz

Völlig unerwartet am halbi 5i am Morge riist eus euse Busfahrer usem schlaf. Mir sind ez scho in Huaraz. No völlig verschlafe hollemer euses Gepäck und sitzed ines Taxi. Zum guete Glück hett irgend en Depp Tür zu üsem Hostel offelah und mir hend eus in 4te Stock id Rooftopbar kämpft. Zu eusem erstuune isch det obe scho einiges los gsi. Irgend en Tagesausflug het anschiinend scho am 5i ahgfange und d‘Lüt hend sich parat gmacht: unter anderem de Marvin 🇩🇪, womer ez scho zum 3te mal gsehnd. Churz drufabe isch au scho de Bsitzer cho und mir hend zum guete Glück scho chöne iihchegge. Bis am halbi 8i hemmer namal pfuust. Denn simmer ue go zmörgele, und hend au en Tagesusflug für eus buecht: Zum Gletscher Pastoruri. Da Huaraz es schöns Bergdörfli ide Gebirgschetti Cordillera Blanca isch (welli die schönste und au die höchste Berge vo Peru beeinhalte) chamer vo det us wunderbar go wandere. Am halbi 9ni het eus de Tour-Bus abgholt und mir sind losgfahre. Bis zum Gletscher hemmer 2 mal ghaltet. Eimal mal bim Bofedal Geysir (wo vorallem eifach de Bode chli blubberet het) und eimal binere farbige Lagune. Bim Gletscher ahcho hend 200 Höhemeter bis wieder 5100 müM uf eus gwartet. Da mer die letzte Täg ahde Küste gsi sind, het eus die Wanderig eher zuegsetzt. Aber es hett sich au dasmal glohnt. De Gletscher isch wunderschön gsi und de Gletschersee devor genauso. Generell scho d‘Autofahrt dethii dur d‘Ande isch wunderbar gsi. Geg die 6i simmer wieder in Huaraz gsi und den hemmer im Restaurant Mamma Mia en Salat gesse. Zrugg im Hostel hemmer eh Tour für de nögsti Tag buecht und eusi frisch gwäscheni Wösch zruggbechoo😍 Es isch jedesmal wieder es wunderbars Gfüühl!! Wieder relativ früeh simmer todmüed is Bett gheit.Read more