So schön chas ide Ande sii

Hüt het euse Tag au wieder am halbi 8i gstartet. Mir sind ue id Rooftopbar go Zmörgele. S‘Hostel stellt eus det gratis Brötli, Eier, Avocado und Banane zur verfüegig. Nacheme feine Avocado-Sandwich hemmer packt und welle us-checke, aber de Aldo (de Bsitzer isch nieneds ume gsi). Üse Tourbus für de hütig Tag het auscho dusse uf eus gwartet. Zum Glück hemmer den na en anderi Mitarbeiterin gfunde, wo gfunde het, mir sölled eifach alle im Zimmer lah. Das hemmer den gmacht und den simmer ab is Auto gstiige. Hüt het eh langi Autofahrt vo 3h uf eus gwartet. Miteme chliine Halt im Städtli Carhuaz isches den steil de Berg duruf gange und d‘Strass isch (eich wie jedes Mal wemmer id Höchi gönd) eher unruhig gsi… Zum Glück het eus au das Mal die schöni Ussicht chli chöne vertröste. Au womer endlich ah de Lagune Paron ahcho sind isches wiedermal unglaublich schön gsi. S‘Wässer isch richtig türkis gsi und es het sogar en chliine Sandstrand dezue gha. Mir sind denn na uf en chlline Mirador (Ussichtspunkt) gloffe, wo mir wiedermal eus eine abgschnuuft hend😂 obwohl de nur uf 4200müM gsi isch. De Rückweg zrugg uf Huaraz het sich uuh mega zoge und ersch geg die halbi 7ni simmer im Hostel zrugg gsi. Nachere frische Duschi und em Us-checke simmer mitem ganze Gepäck is Städtli und ines vegetarisches Restaurant (Inka Frut) gsesse. Mir hend en feine Burger und üses allererste peruanisches Bier trunke. Da euse Nachtbus uf Lima ersch am 22:45 gfahre isch, hemmer na recht viel Ziit müesse totschlah, aber eigentlich simmer bedi fix und fertig gsi. Wie 2 Hüüfeli Elend hemmer gwartet bis mer endlich ah das Busterminal hend chöne. Ufem Weg hemmer na paar Snacks kauft und hoffed ez ganz fest, dasses eh ruhigi Busfahrt wird.Read more