Zrugg id Stadt - Lima

D‘Busfahrt isch maximal unchillig gsi. Ahgfange hetts, dass mer nieneds d‘Möglichkeit gha hend üsi Handys z‘lade und 2tens isches richtig heiss und stickig worde ide Nacht. Gschlaffe hemmer also nid so de huufe. Völlig fertig und verschwitzt simmer am 7ni in Lima ahcho. Mir sind den grad mitem Taxi ih üses Hostel (Kaclla) und hend zum Glück scho chön uschegge und d‘Better im Dorm bezieh. Nachere frische Duschi simmer grad im gliiche Block ines Kaffi gsesse. De Zmorge det isch oke gsi, aber links und rechts sind überall Beschwerde inecho… geg die 10ni hemmer eus für eh Free Walking Tour ahgmolde. Bis mir am Treffpunkt gsi sind, hemmer müesse dur de John F. Kenned Park laufe. Ih dem Park hetts sicher öppe 40 Büsis gha. Es isch richtig süess gsi und ich han mini eigene Büsis wieder richtig ahgfange vermisse🥲
D‘Free Walking Tour isch vorallem im historische Zentrum gsi. De Guide het üs sehr spannendi Sache verzehlt und mir hend schomal en guete erste Ihdruck vo dere riiiise Stadt gha. Nach de Tour simmer neumeds churz öppis go trinke und hend üs es Glace für de Namittag gholt. Mir sind denn nochli im Historische Zentrum umegloffe bevor mir de Bus wieder zrugg in andere Stadtteil (Miraflores) gnoh hend, wo üses Hostel isch. Ez geg de Abig isch da einiges los und es het uuh viel herzigi Restaurant und Barene. Es hett au 2 grossi Hallene mit ganz viel Streetfoodständ. Ih sonere Halle hemmer üs Mexikanischi Tacos ghollt und zum Dessert en Rüebli- und en Pecanchueche.
Am 9ni simmer nach dem lange Tag und dere churze Nacht froh gsi, hemmer wieder chöne is Bett.Read more