Ferietag - Lima

Die Nacht hemmer pfuused wie en Stei. Au wemmer euse Schlag na mit 8 anderne Lüt hend müesse teile, isches eh richtig ahgnehmi Nacht gsi. Mir hend üs ready für de Tag
und üs uf de Weg zu dem Kaffi (Milenaria Cafe) gmacht, wo mer vorher googled hend. De Zmorge det isch würklich wunderbar gsi. Richtig feine Kaffi, eh Acai-Bowl und en Avocado Toast. Mir hend würklich jede Biss gnosse. Nacher hemmer üs uf de Weg nach Barranco gmacht. S‘Kunstviertel vo Lima. Doch chum simmer usem Kaffi gloffe, isch eu de Jonas entgege cho. De Arzt vo Luzern wo mit eus ufem Galapagosboot gsi isch. Wie chlii chan Lima doch sie? De Zuefall isch riisig gsi. Nacheme Schwatz hemmer erfahre, dass er Hüt hei gaht und denn simmer na es willi zemme gloffe. Mir hend üs denn verabschiedet und ihm eh gueti Heireis gwünscht. Barranco selber isch ah de Küste gsi und hett es paar lässigi Wandgraffitis gha. Mir sind denn es wiili de Küste (wieder zrugg uf Miraflores) gloffe und hend s‘schöne Wetter gnosse. Für de Moment het sichs ahgfühlt wie richtigi All-Inclusive Ferie und gar nid so, als wäremer grad am Backpacke. Plötzlich hemmer ah de Küste zue es relativ nices Iichaufszentrum gfunde und sind det s‘erst mal chli ih Shoppingluune cho und hend chli umegüggsled. Spöter bim Kaffi hemmer eus nachli en Plan über die nögste Täg gmacht und die erst Unterkunft buecht. Es chömed wieder richtig lässigi Sache uf eus zue! Mir sind wieder chli wiiter gloffe, bis mer wieder ih dem Stadtteil ahcho sind, wo au euses Hostel isch. Mir sind na ih paar Läde, will ich umbedingt nomal es paar langi, lockeri Hose bruuch. Als eus de Hunger langsam wieder plaaged hett, simmer ih das Sushi-Restaurant (Edo Sushi Bar) womer au de Tag duur mal Googled hend. Ich mun sege, es isch echt unglaublich fein gsi. Mir hend recht gstopft und mit Edamame zur Vorspies nur knapp 17.- pro Nase zahlt. Also seeehr en glungene Znacht gsi. Nacher simmer na ine Bar de berüehmti Pisco Sour go trinke. De Pisco isch s‘Nationalgetränk vo Peru und sone Art Truubemost/Whiskey?! Uf alli Fäll sehr lecker und stark. Nacher im Hostel hemmer eus zum Glück eh warmi Duschk chöne gönne, bevor mer am 9ni zfriede is Bett sind.
Ich mun sege Lima isch zwar eh unglaublich riesigi Stadt, aber gfallt mir unglaublich guet. Mir hend bis jetzt viel schlechts vo dere Stadt ghört, aber für ihri grössi isch sie recht suuber und gar nid mal so luut. Sie isch also sicher es Muss, wenn mer in Peru unterwegs isch.Read more