Ubud Pt.1

Hüt simmer miteme Roller vum Fabi chli ins Landesinnere gfahre, vu Canggu uf Ubud. Nur scho dFahrt inkl. Navigation sind es Erlebnis für sich, obwohl mer eus mittlerwiile uf dem Roller zimli wohl fühled. DStrecki füehrt über gwundeni Strasse durch unzähligi Riisfelder und i jedem Lade am Strasserand chamer Benzin in Absolut Wodkafläsche chaufe. 2 vu dene und de Roller isch wieder zur Hälfti voll und mer chan wieder en Tag zwei umetuckere.
Ubud isch was de Sämy "sGpürschmi-Fühlschmi-Mekka" nennt - alles isch bio, vegan, fit, sustainable und yogi :) scho in Canggu gspürt mer die Hipster Welle mit Instagrammer und Blogger, mal luege öb Ubud schlimmer isch... bis dahi trinkemer ganz bodeständigi Cucumber-Mint-Lime Fusion Freshness und gedenked am Lio :D
Bi dr Wahl vum Hotel in Ubud hemmer eus sehr schwer ta... es git meh als 200 Unterkünft da, eini schöner als die ander und meischtens sehr günstig. Schliesslich hemmer eus fürs Sentosha Yoga Retreat entschiede, es chliners Hotel usserhalb vu Ubud, zmitzt i de Riisfelder. Es isch wunderschön entspannt da, überall plätschert Wasser und usem Spa ghört mer sanfti Musig. So laht es sich vu dr Töffli Massage la entspanne!Read more