Satellite
  • Day78

    The mountains are calling again

    July 5, 2018 in Indonesia ⋅ ☀️ 20 °C

    Hüt simmer vum Meer wieder zrugg richtig Berge gfahre. Doch nu bevor mer in Ende acho sind, hemmer en Platte gha :( mit vereinte Chräft hemmer denn sErsatzrad chenne montiere, under neugierige Blick vu de Dorfchind.
    Zum Zmittag hemmer denn am blue/green Stone Beach Halt gmacht. Mer hend eus eigentlich en Stei-Strand vorgstellt, also en Strand nur mit Stei. Doch wel dLocals hie die farbige Stei sammlet und uf Java verchaufed, isches eher en schwarze Sandstrand mit paar schön grüen/blaue Stei druf - für es Steimännli hets uf jede Fall glanget :) zudem hemmer eusi Huustier-Schmeicheleinheite chenne nachehole, zwei jungi Chatze sind am Rastplatz umegstrielt und froh gsi, ihre Spieltrieb chenne uszlebe. Doch seinte Wiibli isch ganz zuetraulich zu de Martina ufe Schoss und het sogar a ihrem Shirt gsuuget! A propos Chatze: da uf Flores isch eus ufgfalle, as all Chatze ganz en churze, zum Schluss gringelte Schwanz hend - mit Helen&Shane hemmer scho gwerweised gha, öb das ächt en spezielli Art Chatze isch. Hüt hemmer erfahre, as dLocals de Chatze scho ganz früeh de Schwanz verstümmlet um sie so dervo abhaltet, mitem zspile und "zvil" Lärm zmache :(
    Chli wiiter, in Ende, hemmer denn nu euse Aschlussflug uf Labuan Bajo-Denpasar chenne bueche, damit mer Flores bis am Mäntig nid numal mend durchquere. Juhui, nu en wiitere Churz-Strecke-Flug mitere Propellermaschine :(
    Dernach simmer uf Moni, zrugg ind Berge, und hend das wundervolle Panorama gnosse. Bi stahlblauem Himmel hets hie dicht bewachsi Berge wie in Bajawa, doch immer wieder gseht mer Palme und Riisterrasse - herrlich!
    Bevor mer eus i dr Bintang Lodge es chlises Accomodation Upgrade hend chenne leiste, hemmer mit eusem Fahrer messe Tacheles rede. Nachdem mer ihn die letschte Täg voll zahlt und eigentlich nid immer brucht hätted, hemmer eus etz ab Moni selber mit vil günstigere Roller welle dureschlah... das heter denn nid recht verstande, er hätt doch sooo gern sine Chind nu de Kelimutu zeigt... naja, schliesslich het de Sämy mit guete Nerve en Kompromiss chenne ushandle, dMartina het scho längstens rot gseh...
    Etz sitzemer im gmüetliche Bintang Cafe, erfreued eus am erschte Wifi sit es paar Täg und bereited eus scho mal mental ufs früene Ufstah morn Morge vor.*
    Read more