Adios Cusco!

Nachdem mer geschter Namittag vum Ausangate Trek zrugg in Cusco acho sind, hemmer wieder mal all Vorzüg vu eusem 3* Hotel chenne schätze: en heissi Duschi, weichi Better, gheizti Zimmer und natürlich de Wöschservice :D am Abig hemmers eus numal richtig guet la ga: fine Dining und guete Rotwii - so simmer wie scho währendem Zelte am 8i bettriif gsi :D
Hüt isch denn scho euse letschte Tag in Cusco gsi. Wie scho La Paz hemmer Cusco als en Art Hub "missbrucht", als Lückefüller zwüschet euse Toure zum Valle Sagrado, Machu Picchu und Ausangate Trek. D.h. mer hend zwar etz es paar Täg hie verbracht, aber mer sind meischtens meh mit Vorbereitig und Erholig statt Sightseeing verbracht. Das hemmer hüt nu chli welle nachehole und sind gmüetlich durchd Strasse gstrieled und hend numal sensationell gesse. Am Namittag hemmer denn au nu anere Free Walking Tour teilgno. Vil vum vermittelte historische und kulturelle Hindergrund hemmer scho mal imene andere Kontext ghört gha - doch hie und da hemmer scho nu paar interessanti neui Wüssens-Fetze ufgschnappt:
In Peru red mer hüt hauptsächlich drü Sprache: Spanisch, Quechua und Aymara - d.h. Peru isch nid ganz so verstücklet wie Bolivie. Die meischte Näme stammed usem Quechua, die werded meh oder weniger phonetisch ins latinische Alphabet quetscht werded. So gits zum Bispil mehreri Schribwise vu Cusco / Cuzco / Qosqo - korrekterwis spricht mers "Kosko" us... Hüt reded immer weniger Lüt Quechua, vil ziehnd ind Städt und reded na nur nu primär Spanisch.
DFlagge vu Cusco isch als "Rainbow Flag" bekannt und glicht sehr a de amerikanische Pride Flag, sie isch sogar im gliche Jahr igfüehrt worde - ageblich ohni Copy Paste Aktione... dCusquenos resp. dPeruaner sind sehr abergläubisch: oft gseht mer chlini Stier us Ton uf de Dächer (bringed aber nur zzweite Glück), oder Kaktus in de Wohnige (selled die schlechte Geischter dusse bhalte) und zu Neujahr treit mer gelbi oder roti Underwösch (für Geld resp. Glück i dr Liebi) - oft träged dCusqueñer die eint Farb die erscht Tageshälfti und wechslet denn am Mittag dFarb :D
Mer hend au numal vum Chrieg zwüschet Chile, Peru und Bolivie (früener Alto Peru) ghört - offebar isch der Chrieg wege begehrtem Dünger us Vogel-Exkrement a dr Küste entstande. Bolivie het sich damals zruggzoge und het i dr Folg ihre Meeres-Zuegang an Chile verlore.
Die hütig Plaza de Armas isch zu Ziite vu de Inkas zweiteilt gsi: ei Siite zum Sünde bereue (und brüele) und ei Siite zum sLebe gniesse und Ware tuusche (Märcht). Die zwei Plätz sind durch en kanalisierte Fluss trennt und vu Tempel und Paläst umgä gsi. Wo dSpanier cho sind, hend sie die meischte kunstvolle Inka-Muure zerstört und us de gliiche Stei die hütige Chile und Kathedrale baut.
I dr Mitti vu de Plaza de Armas staht hüt en Springbrunne mitere Statue vum 9. Inka Pachacutec. Doch die Statue staht erscht sit 2011 det, ursprünglich isch der Springbrunne vunere Statue vumene Apache krönt gsi! In New York staht en Zwillings-Springbrunne - det macht en Apache ja au nu Sinn - doch die produzierend Firma het gmeint gha, en Apache oder en Inka sig doch sgliiche und het die gliich Statue au uf Cusco gliefered... Es paar betrunkni Iheimischi hend denn der Apache inere Nacht- unf Nebel-Aktion gstürzt - und einigi Jahr später isch denn en Statue vum vil besser geignete Pachacutec ufgstellt worde.
Etz sitzemer im Nacht-Bus uf Arequipa und sind gspannt uf die wiss Vulkan-Stadt.*Read more