Letschte Tag in Maui ☀️

Hüt isch ganz e gmüetleche Tag gsi. Mir si früech ufgstande für ga ds schnorchle. 🤿 Üs isch gseit worde, dases am Morge aube ruhiger sig u ds Meer flach. 🐚 Jedoch het dr Wind anderi Plän gha i isch scho am Morge früech uf Platz gsi. 🌬️ Üs isches auso nid angers gange wie de Speedfahrerinne in Zermatt. ⛷️ Es isch nüt worde mit schnorchle, derfür mit sünnele. 😎 Mir heis üs am Charlie Young Beach gmüetlech gmacht. Uf ds Mau isches aber de chli hektisch worde, wüu öpper im Meer i Not grate isch. 🆘 D Lifeguards si sofort zur Stell gsi u hei chönne häufe. Bizeli später heisi de no gad es zwöits mau müesse cho u zwöi Chind use rette. 🦸🏼‍♂️ Mir si üs fasch chli wie ime Baywatch Fium vor cho. 🎥 Drum simer ou nid so is Wasser, wüumer vor dene Strömige chli Schiss hei gha. Nachem Mittag simer de mau ane ruhigere Strand gwächslet und hei dert de doch no chli chönne bade. 👙 De simer no ufene Joggingrundi und hei ner daheime fürs Znacht aui üsi Räste kochet. 👨‍🍳 Dr Abe heimer ner bir Planig vor nächste Insle la usklinge. 🏝️ Morn geits nämlech scho witer uf die zwöitletzti Insle Kauai. ✈️Read more