es isch de zwoitlesti Tag in Polynesie! Crazy wie die Ziit schnell vergad. Wenni drah denke das ich am Mittwoch im Flugi hocke, stimmt mich das scho biz trurig. Polynesie isch eifach es Paradis. So wunderschön, me chas i Wort gar nid beschriebe, me muss es mit eigene Auge gseh.
Mangos, Ananas, Pompelos... exotischi Frücht wommer hie eifach vode Bäum cha pflücke, früsche Thon tagtäglich, und eifach en einzigartigi Natur und kristallklars Wasser. Ich glaub ich chönt guet nu einigi Ziit da blibe und mis Islandhopping fortfüehre. Und glich bini ready für es nüs Abentür. Wieder biz zrug id "Zivilisation" zu Lüt wo mich verstönd und wo ich d Kultur meh verstah. Uf minerer Reis durch Polynesie hani herzensguti Mensche kenneglernt, wo eifach gebed ohni öppis defür z verlange. Wo Blueme hinderem Ohr bruched, um ihre aktuelli Beziehigsstand z offebare (Fleur à Coeur = vergeh).
Meh merkt aber au de westlich/französischi Ifluss, wo de ganzi positivi Inslevibe biz trüebe mag.
Trotzdem würdi i Zuekunft wiedermal uf Polynesie um wiiteri Insle z erkunde zB d Marquise Island oder d Atolls oder... S rusche vom Meer, die wunderschöne Sonneuntergäng und die bis obe grüenbedeckte Berge wirdi vermisse!
Polynesia Perancis
