San José miteme Tico

Gester hani e gäbige Flug gha uf San José in Costa Rica. I bi am abe acho, ha zNacht gässe u bi de glii ga liege. I bi ime Hotel gsi u ha es Zimmer für mi gha. Dür das hani endlech ume mau guet chönne schlafe u i füehle mi um einiges besser aus in Cartagena.

Dä Morge hani mitem Javier abgmacht. I ha ihn und d Luz (si isch vo Kolumbie) im Bus nach Cartagena glehrt kenne vor paar Tag. Dr Javier isch e Tico (so seit me de Iwohner vo Costa Rica), wohnt in San José u er het mer e Teil vor Stadt zeigt u zudem mega viel über Gschicht und z Lebe in Costa Rica verzeut.
San José säuber isch nid würklech e schöni Stadt u mir si vorauem dür d Houptstrass gloffe zum neue Präsidente Gebäude. Nebedran isch oh no z National Museum u mir si ds no ga aluege u zum so chli meh übers Land erfahre.
Nachdem simer am Theater verbi gloffe bis zum Mercado Central. Uf däm grosse Märit heimer de es typisches zMittag gesse, wo sehr fein isch gsi.

Iz bini wider im Hotel. Da i hie in Costa Rica e gfüehrti Tour mache, hani müesse Zimmer wechsle u ha mini Zimmergnossin scho lehre kenne. I paar Stund wärde mer de oh dr Räschte vor Gruppe lehre kenne.Leia mais