Unbekannti Frücht und es Homestay

Dä Morge simer losgfahre richtig Norde. Unterwegs heimer bime Fruchtlade aghaute u mir hei dörfe huufe neui Frücht probiere. Ds isch sehr intressant gsi, wiu es git Frücht wosi mit Salz esse u eini sogar in Kombination mit Mayo. I muess sege, das die Kombi überraschenderwis guet funktioniert.

Nachdem simer witergfahre iz Dorf Juanilama, womer es feins zMittag hei übercho. Hie dörfe mer ime Homestay übernachte, heisst die ganzi Gruppe isch ufteilt worde uf drü Familie. Mir si z vierte höch bir Familie vor Amanda unterbracht.
Nachem zMittag het üs öper d Farm zeigt. Si hei dert Kakao, Kaffee, Pfeffer, Ananas, Guave, Drachefrucht und no huufe anderi Böim, Pflanze u Wurzle wosi bruche zum esse. Ds isch mega spannend gsi. Zudem heimer no früschi warmi Schoggi übercho, Kafi, e Limo und zletscht no e Shot. Mir si auso komplett verwöhnt worde.
Nach dere Tour simer de zude Gastfamilie gange u dert heimer üs chönne mit ihne unterhalte und chli si. Mir hei oh no e churze Spaziergang gmacht. Zum zNacht heimer üs aui wider troffe u mir hei de Moms (d Müettere vom Homestay) chönne helfe choche. Zwüsch ine heimer sogar glehrt Bachata und Merengue tanze.
Dr Tag isch mega spannend gsi mit viune neue Idrück u mir si iz aui oh zimlech müed.Read more