Im Nebelwald vo Monteverde

Obwou mer hüt länger hei chönne pfuse bini scho 5.30 wach gsi. I ha de no chli döset bevor mer uf si und iz Dorf ga zMorge hole. Ds heimer uf üsem Baukon mit Blick ufe Vulkan Arenal gfrämslet. Nach Kafi u Gipfeli simer losgfahre zur Laguna de Arenal. Dert heimer e Fähre gnoh u si wider abghout worde miteme Bus richtig Monteverde. Da heimer afa öpis zMittag gha u när simer mit dr ganze Gruppe i Nebelwald gange. Dä isch hie bekannt u es het dür das sehr viel verschideni Spezies u e riesigi Biodiversität uf engem Ruum. Zersch heimer im Kolibri Garte chönne d Kolibris beobachte. Schono lustig wisi so umeflattere. Cheibe si eim richtig umd Ohre gfloge.
När simer de i Wald gange. Üse Guide het üs vieles über Epiphyte, über Biodiversität u Vögel erklärt. Er findet Vögel mega spannend u het oh immer es Fernrohr u Feldstecher drbi. Dür ds heimer e Vogel gseh wit obe im Boum, wo i selber äuä nie entdeckt hät. Es isch mega spannend und entspannend gsi.

Am Abe simer aus Gruppe ga zNacht esse. D Rosie het hüt nämlech Geburtstag gha u so heimer no chli zeme gfiiret.

Z Costa Rica startet gad Regesaison u üse Guide het no gseit, es erkälte sech viel Lüt während dere Zit. Da mis Immunsystem offebar kabutt isch, hets mi natürlich oh verwütscht. I ruehe drum iz oh chli meh us u hamer no es Medi kouft das es nid schlimmer wird. Wünschet mer Glück!Leer más