Dr Tag mit Adrenalin starte

Hie in Monteverde gits die längsti Zip-Line vo Lateinamerika u ds hani mer natürlich nid chönne la entgah. Mir hei die ersti Tour am Morge am 8i gmacht u ds ganze geit öpe 2h.
Zersch hets nume so chlineri Zip-Lines gha zum sech agwahne u ner sisi de immer länger worde. Me gleitet de so übere Wald u i has mega gnosse u d Ussicht isch fantastisch gsi. Die längsti isch de 1'590 Meter läng u me cha se im Super(wo)man Style mache, wasi natürlich oh nid ha dörfe verpasse. Zersch hani scho chli schiss gha, aber nach paar Sekunde hani oh dert d Ussicht sehr gnosse. Ds aueriletschte wome cha mache isch sone Tarzan Swing mit öpe 50m freiem Fall. Es geit aus recht schnell u Guides gäbe eim nid mega viel Zit zum drüber nachedenke, was me da gad macht. Ds hani aber guet gfunde, wiu so bini chli weniger nervös gsi. Dr Freifall het mega gfägt u isch e super Abschluss gsi.

Da es ersch öpe isch 10ni gsi, womer si fertig gsi, hei paar vo üs no e Hängebrügge Tour aghänkt. E Guide het üs düre Wald gfüehrt u vieles über d Böim u Pflanze verzeut im Wald. Hie in Monteverde gits über 900 verschiedeni Böim. Me het vode Hängebrügge us oh ne mega tolli Sicht gha uf aues. Was me hie hüfig gseht si die sogenannte Killer-Trees. Da wachse Böim uf andere Böim u die si wi parasite u tüe dr Houptboum ushöhle. Dür ds heimer am Schluss de chönne dür sone hohle Boum ufe chlättere.

Am früeche Nami simer ume zrugg im Hotel gsi u iz simer chli am relaxe. Morn wartet de e länge Reisetag uf üs.Meer informatie