Zrügg a Afang u es Land witer

Gester heimer dr Morge no in Quepos verbracht. Mir si düre Ort zum Märit gloffe, i ha no mis Armbändeli kouft u ner simer am Hafe no öpis ga trinke. Quepos isch nid würk e speziell schöne Ort, drum het ei Morge guet glängt.
När heimer de dr Bus gnoh zrügg uf San José. Wo die Dame vor mir het dr Sitz abeglah hani hurti chli Panik gschobe, wius extrem eng isch gsi u i chli Platzangst ha. Dr Michael vo mire Gruppe het sech de abote Sitz z tuusche u i bi mega froh gsi drum. Dr räschte vor Fahrt isch ner sehr ruhig verloffe.
Am Abe simer no aui zeme ga zNacht esse.

Dä Morge hami de scho früeh vo mire Zimmergnossin verabschiedet, da si no witer geit uf Puerto Viejo zum dert ime Rescue Center schaffe.
I wirde si u oh die ganzi Gruppe sehr vermisse. I ha so viel tolli Lüt lehre kenne u si simer aui az Herz gwachse. Es isch schön gsi, mau ume meh Gsellschaft ha bim Reise u oh dasi d Organisation üsem Guide, am Marvin, ha chönne abgäh. Isch auso sehr entspannend gsi u es si bitz Ferie gsi vom Reise.
I bi chli truurig verlahni Costa Rica scho ume, ds Land u d Lüt simer sehr az Herz gwachse, i hami mega wohl gfüehlt u darf hoffentlich bald ume cho.

Iz höckli am Flughafe, ha no übertüüreti Snacks u Kafi kouft u warte uf mi nächst Flug. Es wird z letschte Land si vor mire Heireis u i wirdes bestimmt nomau fest gniesse.

Pura Vida amigas y amigos!Read more