Ab iz letschte Abentür

I ha gester e gäbige Flug gha uf Mexiko, i ha e Fensterplatz gha (eigentlich nid, aber wiu er isch frei gsi bini überegrütscht) u ha de chönne luege wimer übere Vulkan Arenal si gfloge in Costa Rica. Ds hani zimlech cool gfunde.
Woni de am Flughafe z Gepäck bi ga hole bini weniger amused gsi. Si hei mer mi Rucksackschutz miteme Kabelbinder versieglet u dür ds hanis nid aus Rucksack chönne bruche. Niemer i dem Flughafe het e Schäri oder es Mässer gha ("they don't let us have scissors"). Drum hanis de müehsam düre Flughafe gschleipft bis i e Shuttle ha gfunde, womi zum Hostel fahrt.
Da scho Abe isch gsi, bini no i Supermarkt nebedran ga ichoufe, ha köcherlet u bi früeh ga liege.

Hüt hanis gmüetlech gnoh u bi nachem zMorge zur Busstation nebedran, wiu i mi ha wöue über Fahrplän informiere. I ha de z Busbillet für endi Wuche gad kouft, da si mir het gseit, iz sigis günstiger. När bini zum Parque de las Palapas gloffe, dä isch gad ir nechi vo mim Hostel. Es isch Mittagszit gsi u d Sunne sehr starch. I bi no dür es paar Lädeli gflaniert u zrugg i Hostelpool zum mi abchüele. Dr Nami hani mit Tagebuech schribe (bi 2 Wuche hindedri), plane u läse verbracht. Woni de afa es hüngerli ha gha, hani denkt, dasi mini Räschte vom Vortrag no chönnt werme. Leider isch mer da öper zuvor cho u het mini Teigware gässe. I bi de iz chline Restaurant nebem Hostel u ha z Tagesmenu bsteut: sone Buechstabesuppe u ner Poulet mit Ris u Tortillafläde. Isch auso sehr fein gsi.

Morn gani de für nes paar Tag ufd Isla Mujeres u freue mi extrem druf!Leer más