Mi erst Touchgang

Sit gester bini uf dr Isla Mujeres u die Insle isch würklech mega schön. Für hüt hamer e chline Troum erfüllt. I ha nämlech scho immer mau wöue ga touche. I bi auso am Morge zur Touchschuel gspaziert u dert hani mi Instruktor, dr Daniel, lehre kenne. Zudem si oh dr Andrew und Nicole da gsi. Dr Andrew het wie i ä Discover Scuba Diving Kurs gmacht u d Nicole isch scho meh ga touche. Bim Discover Scuba Diving lehrt me d Basics, me het zwöi Touchgäng, aber me überchunnt kes Zertifikat.
Am Morge heimer auso zersch chli Theorie gha u när simer a Strand füre mit dr Usrüschtig u hei dert zerste mau üses Matrial usprobiert. I ha hurti chli müeh gha am Afang, wius scho speziell isch, nume dür z Muu zschnufe. Dr Daniel het mer aber mega guet gholfe, mi beruhigt u aus zeigt.
Nachdem isch Mittagspouse gsi u i bi mitem Andrew und dr Nicole zersch ga e Glace schläcke u ner ga Tacos esse.
Am Nami isches när mitem Boot use gange. Scho das isch mega schön gsi, wiu z Meer isch so klar u türkis. Dr erst Touchgang het bim MUSA (Museo Subacuativo de Arte) stattgfunde. Mir hei vom Boot us Rückwärts iz Wasser müesse u ner heimer agfange abegah. Leider hani dert aber zimlech müeh gha mitem Druckusglich u d Ohre heimer recht weh tah. Nach paar mau probiere het mer dr Daniel de gseit, i söu doch ufem Schiff bliebe u später probiere. Nid das i mine Ohre no öpis kabutt geit. Während däm die andere de dr Touchgang hei gmacht, bini ufem Schiff gsi u ha d Ussicht gnosse.

Nachdem die andere si zrugg gsi simer zum zwöite Ort böötlet u i has de nomau probiert. Diesmal hets klappet u i has abegschafft. Da i no chli hilflos im Züg bi umegschwaderet, het mi dr Daniel dr ganz Zit ar Hand ghäbt, dasi niene häre tribe. I bi recht froh gsi drum, so hami ufs Schnufe und Umeluege chönne konzentriere. Unter Wasser heimer de huufe Fische u Koralle gseh, e Hai und e Schildkrot. I has e mega schöni Erfahrig gfunde u bi mega stouz hanis bim zwöite mau de gschafft.
Gäg die 4i simer ume zrugg am Land gsi u iz höckli no im Hostel ir Hängematte u liese mis Buech. Dr Tag het mi scho chli brucht, aber es het sech definitiv glohnt.もっと詳しく