Neui Bekanntschafte

Mi Morge het mit Yoga gstartet, ds biete si hie im Hostel ah. Es het mega guet tah wider mau Yoga zmache, i bi nämlech mega gstabig gsi. Wius doch scho recht warm isch am Morge, hani oh gschwitzt wine Bär. Nachdem hani mi afa es bitzi erhout u bi ner ga zMorge esse.
Dr ursprünglech Plan wär es Velotürli gsi zum d Insle erkunde. Stattdesse hani am Mittag, wos am wärmste isch no hei telefoniert u mi de ner am Nami entschiede usezgah. I bi zersch öpis chlises ga esse, aber dHitz isch würk recht stark gsi u mir isch chli schwummrig worde. Drum hani gfunde es sig ke gueti Idee so ufnes Velo zgah u bi afa mau zrugg iz Hostel i Pool. Womi chli abküehlt ha, bini de no zum Playa Norte gloffe u oh dert hurti iz klare Wasser. Dr Ufenthaut am Strand isch nume churz gsi, wiu es het chum Schatte u i wot mi nid nomau so fest verbrönne.
Zrugg im Hostel bini mit ere Mitarbeiterin vom Hostel iz Gspräch cho. Si isch vo Mexiko u macht uf dr Insle es Internship für 6 Monet. Mir hei mega lang zeme gredt u si het mer vieli Tips gäh u öpis über Kultur vo Mexiko verzeut. So isch mi Nami oh schnell verbi gange.
Am Abe hani de no packt u när bini uswärts ga esse. I bi imne mexikanische Restaurant gsi u irgendwie mit dr Larissa iz Gspräch cho. Si isch ursprünglech us Texas, aber lebt sit drü Jahr uf dr Isla Mujeres. I ha de zu ihre a Tisch gwächslet u mir hei zeme gässe u plöiderlet.
Oh weni nid viel gmacht ha, hani Zit mega gnosse u neui Bekanntschafte gmacht, was sehr schön isch gsi. Morn verlahni d Insle leider scho ume. Mir hets sehr gfaue hie u i hoffe, dasi irgendwenn mau ume cha zrugg cho.Read more