Hotels, Casinos u paar Wasserfäll

Z Abentür het am Morge früeh ar Union Station gstartet. Mir hei dr Zug gnoh richtig amerikanischi Grenze. D Fahrt isch sehr agnähm gsi u gueti 2 Stund gange bis mer in Niagara Falls si acho.

Vom Bahnhof simer e gueti Stund zu de Niagara Fäll gloffe u scho dr Weg häre isch spannend gsi. Aus erst faue eim nämlech nid die idrückleche Wasserfäll iz Oug, sondern die viele Hotels, Casinos, Vogelbeobachtigscenter, Restaurants, e Zip-line usw. Im Gägesatz zu dene viele Hochhüser würke d Wasserfäll nebedra gad recht chli.

Weme ds aus ignoriert si aber d Niagarafäll sehr beidruckend. Dr Niagara River bildet Grenze zwüsche Amerika u Kanada. Es git d American Falls, wo komplett uf dr amerikanische Site si u d Horseshoe Falls wo uf kanadischer Site si. Grundsätzlech gseht me vo Kanada us beidi am beste. Üs het oh recht überrascht, das im Becki unte so viu Isscholle si umegschwumme, aber isch recht cool gsi ds mau eso zgseh. Dür das si vieli Aktivitäte, wie Bootsfahrte, nid oder nume igschränkt möglich gsi. Mir si de d Fäll ga aluege u hei dert öpis zMittag gässe. Am Nami heimer no am Gscheh rundume zuegluegt u si ner retour gloffe. Ufem Retourweg simer de über Clifton Hill gspaziert. I dere Strass chunnt me sech plötzlech vor wie ire andere Wäut. Es het huufe Spielhalle, Shops u süsch so fancy, nordamerikanischs Züg. Uf ne Art faszinierend u glich fragi mi de, was so öpis nebem ne Naturspektaku z sueche het.

Ufem Weg a Bahnhof heimer no ä guete Donutlade gfunde, si Snacks ga choufe u ner ume zrügg uf Toronto gfahre.Read more