Lynn Canyon Park

Hüt Morgä si mir i nä Supermarkt üses Picknik ga iichufä u hi üs när uf d‘Suechi nachem Bus gmacht wo üs zum Lynn Canyon Park gfahrä het. Diä Busfahrt isch ca. 1,5h gangä & dr Chauffeur isch sehr schnäu über diä Strassenä & em Highway freset, mir hi üs mängisch chli müessä häbä.😆
Abr dr Usblick usem Fäischter isch immer sehr iidrücklech gsii u hii sofort dr Wächsu gseh vor Stadt ufs Land.
Wo mir bim Lynn Canyon Park si acho, siimer när dürä Waud glofä, mit hufnä Houzstäggi u Wanderwägli. Dr Waud isch mega schön & iidrücklech gsiit mit dänä höchä Tanni u Miiesch ah de Escht. Ds Highlight vo däm Park si diä zwo Brüggene gsii, Lynn Canyon Suspension Bridge (Hängäbrüüg) & Twin Falls Bridge.
Bir Hängäbrügg hets mega viu Lüt gha, da aui äs Foto hii wöuä machä & de hiimer chli däm Gscheh zue gluegt. Mir si när chli speter no ah Fluss abä klätteret u si usem stuunä fasch nümä usä choo.🙈 Diä Farb vo däm Wasser isch so faszinierend gsii, so richtig grüüen & klar. Mir hi dr Usblick & d’wermi vor Sunnä sehr gnossä.☀️ När sii mir wiedr zrugg glofä & si mit em Bus wiedr uf Vancouver gfahrä. Nach däm schönä & ahsträngende Tag sii mir no i näs Kaffi feini Cheescake‘s ga ässä. Da morn üsi Reis am Morgä früeh wiiters nach Vancouver Islands giit, sii mir när zrugg ids Hoostel ga packä u zum Z‘nacht no ä feini Pizza ga ässä.Read more