Mit dr Fähre id Rueh vor Natur

Iz wod Ostertäg düre si hets üs anes witers Ort verschlage. Mir si am Morge früeh los uf Tsawwassen az Fährterminal u hei dert e Fähre gno richtig Swartz Bay. Dr Weg isch mega idrücklech gsi mit si viu tolle Landschafte. Mir si beidi immer wider mau use ga luege u stuune. Bsunders nachdem Michelle het e Flosse gseh uftouche (es het hie nämlech huufe Wale). Leider isches aber bi däm einte mau bliebe. In Swarty Bay acho simer de ufe Bus nach Victoria, womer gratis hei dörfe bruche dank em Earthday.

Z Städli Victoria isch mega hübsch. Es isch d Houptstadt vo British Columbia u drum hets dert oh es Parlamentsgebäude.
Mittlerwile si beidi am schnudere u nid 100% fit, aber mir mache z beste drus u nämes drum haut oh chli gmüetlecher.

Am nächste Morge heimer üses Mietauto abghout u si zum Kinsol Trestle gfahre. Ds isch e auti Isebahnbrügg wosi guet erhaute hei u me iz cha drüberloufe. Es isch gad sehr schön chli meh i der Natur zsi u mir gniesse z früehligshafte Wätter.

Nachem zMittag simer witergfahre uf Lake Cowichan, womer miteme Caramel Macchiato si a See ghöcklet u zwöine Buebe hei bim Velofahre u bade zuegluegt, was recht amüsant isch gsi.
Gäge spätere Nami isches när Zit gsi zum ichecke i üser Unterkunft in Youbou. Mir übernachte bir Cathy und em Dave u Cathy het üs sehr herzlich begrüesst. Mir heis hie mega gmüetlech mitem chli terrässli womer oh no gad hei gnosse. Morn wird wider mau chli usgschlafe, sodass sech üsi Erkältig mau aständig cha erhole.Read more