Gfrorne Lake Louise

Dr Tag het wider mau chli früecher gstartet, mir hei e länge Wäg vor üs. Z hütige Ziel isch dr Lake Louise gsi im glichnamige Örtli im Bundestaat Alberta.
Vo Golden us fahrt me chli meh aus e Stund u mir si öpe um die 10 acho. Es isch no nid so viu los gsi denn u es het oh gad zimlech gschneit. Einisch meh simer froh gsi um üsi Winterjaggene.

Vom Parkplatz us isches nid wit zum See u ufe erst Blick hets fasch chli trist usgseh no mit dem Nebel. Dr See isch no gfrore u ds bliebt oh no bis i Juni ine eso. Sächs Gletscher sorge drfür das dä See Wasser überchunnt u im Summer schimmeret er aube schön blau. Dr grösst Teil vom Jahr isch dert obe aber Winter.
Mir si no am See entlang spaziert bis mer am andere Endi si gsi u ume retour. Zwüschezitlech isch no d Sunne fürecho u het dr gfrornig See ines mega schöns Liecht gsetzt.
Womer ume am Startpunkt si gsi hets de oh meh Touriste gha. Im Summer muess hie äuä um einiges meh los si u mir si wider mau froh gsi um dZwüschesaison.

Mir hei de zMittag im Camper gässe u si när ids Dörfli abe. Dert hets allerdings nid sehr viu, mir si no i paar Lädeli u ines Kafi. Es isch erstunlech chli weme bedenkt, das hie nid nume dr See bekannt isch, sondern oh ds Skigebiet. Schliesslech wärde hie regumässig Weltcuprenne ustreit.

Da me im Ort selber nüm viu het chönne gseh, simer früecher ume zrugg gsi aus erwartet, hei no gwöschet u Reste gässe zum zNacht.Read more