Siem Reap & Angkor Wat

Angkor WHAT?

Haha. Mir sind witzig. Grenzstadt Poi Pet isch wahrlich nüt schöns & drum simmer denn au am Tag druf - 17. Mai - witer in Richtig Siem Reap. D'Fahrt dethi isch wild gsi. De Fahrer vo eusem "Bus" aka en PKW vomene Kolleg wo eus "Busticket" verkauft het, het zersch no müsse sini Frau abhole. Die het denn no uf Wösch müsse warte. Denn simmer uf e Baustell go Material ab- und Uflade - und denn endlich uf Siem Reap gfahre.

Det acho, hemmer eus en Scooter gnoh, sind is Hotel gfahre & hend denn mehrheitlich eifach nochli chillt. Mer hend gwüsst, dasmer früeh is Bett söttet, willmer am nächste Tag am 4i ufgstande sind - mir hend de Sunneuntergang in Angkor Wat welle gseh! 😍🤝

Das hemmer denn au gmacht. Es isch en sehr schöne, aber strenge Tag worde 🥵 d'Hitz isch am Morge no einigermasse ushaltbar gsi, je meh sich d'Sunne aber zeigt het, desto unerträglicher isch sie worde. Glich sind all die Tempel um de Haupttempel Angkor Wat ume eifach extrem beeidruckend & wunderschön gsi. Obwohl die ganz Alag scho sit hunderte vo Jahr verlah isch, chamer d'Energie drin nach wie vor gspüre 🙏

Es het denn no ei eher unschöni Begegnig geh. E Frau het en Aff, wo ihre vorher e Fläsche klaut het, eifach miteme Stock uh mega fest uf de Kopf gschlage 🤯 Tally isch ohni Nahdenke super hässig worde & het dere Frau ziemlich dütlich gseit, was sie vo dere Aktion haltet. Und mir sind eus sicher - au wenn die Frau kei Englisch het chönne, isch ihre sehr klar gsi, was Tally gmeint het! 😅🤝

Was de Kontakt mit de Iheimische agaht, simmer au bi Angkor Wat eher chli "enttüscht" worde. Wenn, denn hend sie eus welle öppis verkaufe; teils sogar sehr aggressiv. Und wenn sie das nöd hend chönne, simmer nüme interessant für sie gsi. Glücklicherwis hemmer aber am gliche Abig no de Kean kenneglernt - dank ihm hemmer am Tag druf es neus Bild vo dem Land becho 🙏❤️Meer informatie