Älmhult🌾🍲

Hüt am Morge isch, wi gloub bis itz jedesmau, e ganz gmüetleche Morge gsi. Woni no im Bett glägä bi u uf ds Handy gluegt ha, hani gseh dasi e ganz tolli Nachricht vor Schwoscht ha übercho. Si het di 2 Zwillinge souverän uf d Wäut brunge u itz si Thaa u Simu 3-fachi Eutere u ig 1-fache Götti. Judihui!
Miteme Fröidegump bini ufgstange, es liechts Zmorge ga näh, duschet, zwägmacht u ab uf Älmhult i ds Muff, ines Vegans Restaurant, gah Zmittag ässä. Es isch erstuunlech fein gsi u d Bedienig isch sehr fründlech gsi u i gloub si het ab üs oh zimmlech fröid gha. Nach däm Zmittag simer när widermau es Ründeli für d Hüng gah mache u zwar am See Möckeln. E witere See wo eifach ultra ruehig isch u me het ds gfüeu es sigi nume mir da u süsch niemmer.
Zrügg im Hüsli heimer e ganz gmüetleche Namittag/Abe verbrunge mit lecker Bierchen, Musig lose u bäuele. Da hani du vernoh dassi ir Schwiz hinger ds Chindstandli steue wei. Chli chli närvös bini gliich no gsi, aber woni Gälu ha ahglüte us gheisse het es sigi scho eis gstange u itz no eis abgleit wordefür d schiudli dra ds tue bini du beruehigt gsi. Miteme Livevideo hani sogar no gseh wis du äntgüutig isch gsteut worde. Super Sach!
Mir hei ahschliessend no Znacht gässä, u när heimer nacheme lange gchnortz migottseu no chönne ds eröffnigsspiu Dütschland-Schottland vor EM chönne luege. Nachem Mätsch heimer natüürlech nümme ds lang gmacht, da ja morn üses nächschte Abentüür los geit.Read more