Örnefjordens Camping🇸🇪🛖

Hüt am Morge simer ca. am 8i uf. I ha eifach gängno chli müei mit schlafe, das scho fasch am 4i am Morge taghäu isch. Mir si so früech uf, für dasmernis hei chönne schweren Herzens vo Schübi, Silu u Michu verabschide. Di si am haubi 9ni los für ume gliich hei ds gah, wimer si cho. Mir säuber hei planet, ca. am 10ni ds fahre. Mir hei no schnäu es Kafi gnoh u si när gloub beidi chli närvös gsi für ds gah u drumm simer när scho ca. am haubi 10ni los. D Verabschidig vo Percy, Anja, Karan, Esther u Toni ischnis nid liecht gfaue. Mir hei schliesslech oh e wuche lang e ganz e geili zit mitenang erläbt. Merci für aus!
So da hockimer itz, ds zweit ime Mietouto, ufem wäg i Norde e chliine läbestroum vo üs ds erfüue. Es ischnis scho chli surreau vorcho, natüürlech oh nach derä wuche ds 10 i eim Hüsli, da isch das wonis itz bevorsteit fasch chli e Gägäsatz, aber e schöne.
Mir hei Göteborg apeilet, womer ufeme Parking hei haut gmacht u när ds Fuess chli i d Stadt si. Mir hei am Odinsplatser im Odins Parkgrill öppis gässä. Es isch üs beidne irgendwie aber nid so wou gsi (mir si sicher oh nid grad im schönschte Viertu glandet) u drumm simer när grad ume zrugg i ds Outo u witer. D Landschaft wird afe so chli rüücher, aber drnäbä änderetsech nid viu. Roti Hüsli, viu Waud u äbeni Strasse... Womer vor Outobahn hei abgha richtig Kungshamn heimer du sofort gmerkt das ds e spezieue Ort wird si, zwüschiche ds Meer wo bis i ds Gras iche chunnt, Feuse, när ume es Brüggli. Mir si zersch grad hurti füre uf Smögen, wosnis scho fasch chli d Sprach verschlage het. Ärdeschöön! D Kombination us de farbige Fischerhüsli u de unberüehrte Feuse isch ganz einzigartig! Mir hei jede Eggä probiert ds uskundschafte bismer när am 5 Uhr im Örnefjordens Camping si gah ihcheckä. Ufem wäg dert härä simer no schnäu gah ichouffe, so dasmer säuber öppis znacht chöi choche, da üsi Kabine womer miete näbeme Bad oh e Chuchi het. Womer du di Kabine hei bezoge isches cho grediache Schiffe u es het bismer si ihgschlaffe oh nid ghört. Drumm hei mir üs oh eifach e gmüetlech abe im Hüsli gmacht u när oh fridlech ihgschalfe.Leer más