Beitostølen🇧🇻⛰️🧭

Dä Morge simer so erhout ufgwachet wi äuä no nie, da d Bett ganz gäbig si gsi. Mir heinis när grad parat gmacht u si ufbroche richtig Holmenkollen, dert obe heimer nämmlech scho vor Opere us gseh, das dert e grossi Schiisprungschanze isch. Mit gross heimer de ouso oh rächt gha, es huere tütschi! I würd ömu äuä nid dert achegumpe... d Ussicht uf Oslo u ufe Oslofjord isch ouso oh nid schlächt gsi.
Vo dert us simer no hurti gah tanke u "zmorge" chouffe u när isch di fahrt losgange, use usder Stadt, richtig Bärge. Eis wo üs scho meh ufgfaue isch: hie si äuä würklech bau d heufti Elektrochärä! Di fahrt isch gäng wi schöner worde. Mir si nämmlech oh nid grad uf diräktem wäg uf Beitostølen, sondern via Gol gfahre, wüu d Strecki uf Google Maps chli geiler het usgseh. U ds hetsech gloub bewährt! Ei See nachem angere, ueche ache, när simer uf ds mau uf sore Hochäbeni gsi u när ume hingerache u weiss bau nümm was aus. Mi isch ömu usem stuune fasch nümm usecho. Währendem fahre heimer ds Beitostølen es Airbnb buechet. Mir sy zwar ender dert gsi aus abgmacht aber dr Schlüssu isch ömu gliich scho gsteckt. So heimernis ihgrichtet u itz definitiv bestumme dasmer itz morn di Besseggen Wanderig wärde mache. Für das hani du no par Sache müesse bueche. Ufem wäg zum ihchouffe heimer no schnäu dr "Vermieter Jan Olaf" troffe, ganz e gäbige, wi bis itz eigentlech aui Norweger womer hei troffe. Womer si hei cho heimer no chli di witere Ferie planet, zwägggmacht für morn u Znacht gässä. Ire Rägäpouse simer no schnäu a See Øyangen ache u när no chli EM luege u när gah lige. Morn müessimer de fit si.Read more