Besseggen Wanderung🪨🌧🌞

Dä Morge simer am 7:30 Uhr ufgstange, so das mir gnue Zit hei für gmüetlech Nutellaschnittli ds ässä, ufdsruume, ds packe u chli ds putze. Am 9:30 Uhr fahrt nämmlech de üses Böötli u mit no 35min. Fahrzit zum Parkplatz u när mitem Shuttle zum Boot isch ds perfekt ufgange. Scho währender Outofahrt si mir überwäutiget gsi vo däm Gebirge, unändlechi Hochäbenine u Seee u när heimer sogar no 4 Renntier gseh!
Itz hocki mir ouso i däm Boot ufem Gjendesee, ca. es haubs Jahr nachder Planig vo derä Reis u derä Wanderig. I hami grad sofort verluegt gha i di Wanderig nach däm ig die gseh ha im Internet u itz stöhmer eifach vor drann, ganz es schööns gfüeu! Chli Angscht heimer zwar oh gha, mir si ja dä Wäg gliich no nie gange u ds Wätter isch so chli naja gsi. Bim uechefahre mitem Outo simer nämmlech oh dür chreisdicke Näbu u Rägä gfahre. Womer aber ds Memurubu si usgstige usem Böötli hets numeno liecht grägnet u mir si sofort i erscht grob Ahstieg iche. Scho mau zimlech sträng gsi, es si hie nämmlech nid so Wanderwägli wimes vom Bärneroberland kennt... mä loft meh eifach dürne Steistreiffe uf. Üs het aber scho irgendwie düecht es gsei chli nach Bärneroberland us aber es isch irgendwie gliich oh aus angers aus i üsne Bärge. Obe am erste Ahstieg hets de ghört mit rägne u när isches zimmlech flach obedüre. Bevormer hei wöue ässä isches du hurti no cho chutte u rägne, so dasmer ömu de sicher chaut hei gha bim ässä. Vo Schärmä isch da natüürlech nüt ds wöue. Aber itze, mir hei üser Sandwich, womer am Vortag gstriche hei, hurti hingeregschlezt u si witer am Bessevatnet entlang, so dasmer wider warm hei. U när simer vor dä bekannt Kamm cho, wome ueche geit. Da heimer du scho chli däicht " denä spinnts doch": eifach e öppe 5m breite Kamm wo nume us Felsä besteit u zum tiu meh aus 100% stigig het. Dr "wäg" isch zwüschiche mitem rote T beschribe gsi, so hesch ömu gwüsst wet a denä verbiloufsch, dasdi nid grad i Abgrund stürzisch. Ami vorab u ig hingernache heimer Schritt für Schritt u Stei für Stei gnoh. U so simer obe druffe ahcho. Dä Ahblick isch scho irgendwie magisch gsi u het richtig süchtig gmacht. Witer ischs när ume veiechli äben wo du oh d Sunne isch cho füre glüüssle. Da hami no drzue entschlosse no hurti eis zrügg ds gah fürnes "perfekts" biud zmache vom Kamm u denä zwe Seee. Wi gseit, es macht süchtig dert obe ds stah. Ahschliessend simer witer cho zum höchste Punkt vor Wanderig womer no par Säubschtuslöserbiuder hei gmacht u es Holländerpäärli troffe. Di si sit 3
Wuche ds Norwege ungerwägs u si zur Trolltunga u zu Gletschere gwanderet, aber so öppis wi hie heigesi oh no nid gseh!
Vo dert ah isches när meh u minger numeno nitzi, aber d Ussicht isch nach wi vor, bis z ungerscht ache schön gsi. Dunger bim Schiffsdock simer du scho bau chli kabutt gsi u hei no es Bierli une Glace gha, bevormer ume ufe Shuttle zum Outo si. Mir hei ca. 14km u 1200 Höhemeter zrugggleit u hei öppe 7h gha. Mir si när i ds Fjellpark Maurvangen Camping gah icheckä fürnes Hüsli i Empfang ds näh. Es isch chli naja gsi... tüür für nidemau e Duschi im Hüsli u für warms Wasser ir Sanitärahlag hetme müesse Jetons chouffe wo öppe 2 min. warms Wasser hei gäh. We ds wenigschtens öpper hät gseit, das de 1 Jetons nume 2 min. het!
Am abe heimer när üses Standardzüg gmacht u unger angerem no üsi Chochusrüstig testet, wo de ihwandfrei het funktioniert! Es het natüürli oh widermau afah rägnä womer im Hüsli si gsi (wi bis itz jedes mau) u de heimernis im Hüsli stiu gha. Mir hei ja schliesslech gnue erläbt hüt!Läs mer