Blokhus🚢🇩🇰🏖☀️

Dä Morge simer, wi chli erwartet, nid ganz so erhout ufgwachet. So im Outo lige isch haut scho nid grad dr gröst Luxus. Aber äbä isch ja chli ds erwarte gsi. Mir heinis när gliich parat gmacht, so dasmer am 5i hei chönne fahre. Mir hei nume grad 8Min. gha bis zur Fähre. Ds ihchecke isch kes Problem gsi u hetme grad vorere Barriere chönne mache ohni us ds stiige. Dasmer es Mietouto hei gha, womer ds Nummero ja no nid hei chönne wüsse bim Bueche, het keh sou intressiert. Chli spezieu aber herrjesses. Öppe am haubi 6i heimer uf d Fähre dörfe u si iche afe eis öppis gah ds Zmorge näh. Dinne isches wi imene Flugzüg gsi. Aus mit Sitzreihene u mi het chönne abhocke wome het wöue. Wosi du los gfahre isch, di Fähre, simer no hurti use dasmer Norwege hei chönne tschüss sägä. Nach 10 Täg verlöhmer ds Land ouso wider. Aber es si 10 unvergässlechi Täg gsi. Mir hei vo zuegfrorne Seene bis Sangstränd, vo unändleche Äbenine bis ganz hügelegi Feuspartie, aus gseh. Mir si dür Rägä u luft womer chaut hei gha aber oh vor Sunne küsst worde. Mir si uf ganz höche Hügle, voreme Gletscher, vor grosse Houzchiuchene, vor ganz grosse Wasserfäu, ufeme grosse Feusplateau, ufeme ihklemmte Stei, ire grosse, vo Natur gmachte, Höhli, bimene Lüüchttürmli, i überfüute Gässli u i ganz einsame Campingplätz gstange. Mir si vo Flüss über Seene u Fjorde bis a ds offne Meer cho aber ds bade hetnis leider nie glustet. Äntwoder wüus ds chaut oder ds Gwässer nid so schnousig isch gsi. Ds weimer aber itz de ds Dänemark no nachehole. Nach öppe 2.5h umene churze nuck speter hei mir Dänemark oh scho chönne hallo sägä u druf fahre. Hie isch aus cheibe äben u zimmlech aus bewirtschaftet. Mi gseht ume meh gwächs u Tier. D Infrastruktur gseht aber meh u minger gliich us. D Schiufdecher imponiere mi no zimmlech, ds hetme ds Norwege niene gseh. Mir fahre öppe 50Min. bis uf Blokhus, womer widerum es Airbnb für 2 Nächt buechet hei. D Brita, e euteri Frou u d Gastgäberin hetnis öppe am 10ni scho seenlechscht empfange u nis schnäu üsi Ungerkunft zeigt. Mir hei scho schnäu chli desume gluegt, aber mir hei eigentlech so schnäu wi müglech a Strand wöue, u zwar mitem Outo. Ds isch da nämmlech e Strand wome öppe 20km läng aus ufem Sang em Strand nah cha fahre u parkiere womer grad lust het. Schono e cooli ahglägeheit. Mir plegernis eifach härä u göh zwüschiche chli gah bädele u plegere ume härä. Genau das heimernis zum Abschluss no gwünscht. Mir hei oh super Wätter verwütscht. Mir hei öppe 24° u es lüftelet gäng chli. Ahgnähm u sicher nid zwarm. Morn wotts aber de 28°!
Mir si ouso chli am Sünnele u bädele u aues isch guet bismer am abe ir Ungerkunft si gsi. Uf ds mau hets tiune Orte chli afah brönne u isch rot worde. Mir heinis beidi veiechli verbrönnt. Mir lehris äuä nie! Aber itz, haub so schlimm, mir wei no öppis feins gah Znacht ässä u Ami het dr wunsch Fisch u angers Meeresgschmöis gah ds ässä. So simer i ds "Blokhus Fiskerestaurant". Dert gits Buffet, es chauts unes warms u zum Glück gits oh nid nume Fisch, zmingscht bim warme Buffet. Bim chaute hani nume zweiergatig Salät gfunge ohni Fisch oder derartigs. Ds warme Buffet isch när drfür umso besser gsi. Fasch ds guet, wüu vom Dessertbuffet het när zäges nüt meh ichemöge. Nachem ässä simer no eis mitem Outo chli em Strand nah gfahre u si no chli gspaziert u usem Kofferruum use chli em Sunneungergang zuegluegt. Ärdeschöön gsi. Zrugg ir Ungerkunft simer beidi när rächt schnäu ihgschlafe. Guet Nacht.Read more