Google de Sparfuchs🦊

Höt Morge semer am 4i uf. Warm ipackt ond met Kaffi ond Rusk (es Südafrikanischs Gebäck zom im Kaffi dönkle) usgröstet, semer los rechtig Högel. S Ziel esch gsi de Sonneufgang det obe luege. Ond de hets defitiv geh, es esch e wonderschöni Stemmig gsi. Nachem Sonneufgang beni chli döregfrore gsi, wel obwohl mer döre Tag warm hei, esches det obe metem Wind, scho eher küehl ide Nacht. Weder be eus em Hüsli semer de nomol is Bett ikuschlet ond hei bis am 7ni pfused. Nachere ufwärmende Duschi, esches de ab zom Zmörgele gange. Uf die 9ni esch alles packt gsi ond im Auto verstaut, för eus esches höt nehmli witergange. Före Mettag/Nomittag, heimer e Stausee apeilt, wo scho sehr nöch a eusem hötige Öbernachtigsort esch. Alles so wit so guet, nach chli meh als 3h, hed eus de s Navi au ab de Hauptstrosse glenkt ond ufnes Wegli. Zerst hed da ja no einigermasse okey usgseh, för so d Verhältnis dos onde aber scho gli hets riese Dulle ond Löcher gha. So tüüf, dass de Stefan hed mösse use o d luege, dasi jo ned meteme Rad abem Weg chome. Schösch wär euses Auto defitiv kapott gange. Nach dere Strecki heimer de plötzli e Teerstross gseh, mer hei scho döregatmet aber nein, euse Schotterweg hed öber neh "Brögg" ufmes Maisfeld gfüehrt. Ond scho semer ufem nöchste Abentürweg gsi, zmets em Maisfeld😄😄🫣. Ergendeinisch heimer de chöne kehre ond send nomol zo dere Brögg zrög, det hed no es Wegli ade Teerstross no gfüher, e be de use ond be dasmol go luege ond.... tatsächli, ergendwo witervore hets e Löcke geh womer hei chöne uf dir Teerstross usefahre😍. Korz drufabe semer de au wörkli zo dem Stausee cho ond det hets de e Pause ond es Zmettag geh😊. Nachere längere Mittagspause, heimer de die normali Stross usem Park gnoh ond hei de au gseh, dasmer hätti mösse zahle, zom i de Park inecho😄 upsi🫣, wie gseit Googlemaps de Sparfuchs🦊😉.
Weder uf de "Autobahn" semer de scho bald be eusere Onterkonft gsi. Det acho semer metem Kaffi gmüetlech e Garte usegsässe ond hei die nöchste Täg ade Garten Route onde planet😊. Nachere frische Duschi semer uf Empfehlig vo eusem Gastgeber is Resti Olives&Oils go Znachtesse ond mer meu säge, s beschte Ässe bis jetzt uf dere Reis😍.
Weder dehei, beni so müed gsi dasi am 9ni scho gschlofe ha, darom gits de Bitrag au erst höt Morge😄.
Schöns Tägli☀️, be eus gohts jetzt meteme Abstecher i botanisch Garte, de rechtig Floghafe uf Durban.Read more