Lissabon

Z' Lissabon aacho, simr ufnä grossä Camping zmitts imnä Eukalyptus-Waud.
Am Abend hatten wir eine tolle Begegnung mit zwei deutschen Mädels – "Alter Falter" gehört jetzt in unseren Wortschatz.
Wüus diä ganz Nacht grägnet het u so aui Böim nass si gsi, heimr mit Hiuf vo däm wunderbarä Eukalyptus-Duft ganz beschwingt chönnä ufstah u si när ab uf Lissabon.
Us ersts simr grad uf Belém. Ds isch ä Stadtteil vo Lissabon. Dert simr "Padrão dos Descobrimentos", z' Dänkmau vodä Entdeckigä, gah aaluegä, hei ä HotDog gnossä u si no zum Torre de Belém (sonä schwümmendi Burg). Da ä Umängi a Lüt isch aagstangä, heimr ds autä Geböide vo uss betrachtet u si när witr. Bevor mir ganz uf Lissabon inä si, simr no is Pastéis de Belém – ä auti Konditorei (vo 1837). Bekannt sisi fr süessi Blätterteigchüechli, wo üs wermstens empfohlä si wordä. U tatsächlech – diä si de fein gsi!
Nach däm Goumäschmous simr mitem Tram iz Zäntrum inä. Dert simr dürnes imposants Stadttor grad zur Houptstrass cho. Hie heisech verschiedeni Lädä, Souvenirlädeli u Kafis anänang greit u hei ä gschäftegi Stimmig vrbreitet.
Nachdäm mir Abstächer i paar Lädeli hei gmacht, simr no churz dr kunstvou Bahnhof gah bestuunä u när widr ä Hügu zdruf zurä Kathedralä. Z' Fuess merktmä sofort, dass diä Stadt bekannt isch fr ihri 7 Hüglä...
Nachemnä churzä Zwüschähaut simr quer dür d' Stadt zurä Burg ufä. Dä Teil isch ganz charismatisch gsi, mit Girlandenä, Graffitis u gmüetlechä Kafis. Ufem Wäg zur Burg heimr über d' Stadt gseh u üs so mau ä Überblick chönnä verschaffä, wo was isch. Je nöcher dasmr zur Burg si cho, desto meh Souvenierlädeli hets widr gha.
D' Burg heimr vo ussä gluegt, da sie o hie widr Iitritt hei vrlangt u mir eich nid hei inä wöue, sondern nur z' Panorama hei wöue gniessä.
Womr widr ufem Wäg gägä abä si gsi, simr no ines Kork- u Töpferlädeli gah schmökerä – wunderschöni handgmachti Sachä!
Ufem Rückwäg zum Camping simr i TimeOut Market, o widr ä Tipp vo ussä und hei dert Pastéis de Bacalhau probiert, so frittierti Härdöpfu-Fisch-Chuglä.
Widr ufem Camping heimr Znacht gmacht u si ungerä.
Hüt Morgä si d' Dana u d' Steffi uf Lissabon inä is "Nicolau Lisboa" gah zmörgelä – u ds isch wahnsinnig guet gsi! Tolls Personal, gmüetlechs Kafi u mega feins u früsches Ässä! Absolut empfählenswärt! #merciSara
Ungerdessä isch dr Dave i Decathlon u hetsech dert chönnä entfautä mitemä spontanä Zäutchouf.
Widr vreint simr nachem Zämäruumä ufä Wäg Richtig Sagres.
Gschlafä heimr z Melides ufemnä schönä Camping und – ach ja: z' Lissabon heimr dütschi Nachbarä gha und voila, o hie z' Melides simr grad widr Nachbarä gsi! Sehr amüsanti Begägnig!Read more