Cape Coast

Hüt sind d Mama und  d Sarah am Morga wieder loszocha zum Zmorga bsorga. Zimli bald sinds zrugg cho mit Brot und Cornflakes. Wo mer hond wella zmörgala hommer denn aber gsecha, dass s Brot ahgrauet gse isch, somit hetts denn ofach cornflakes und cookies zum zmorga geh. Danoch simmer mit ma Uber los zu da Trotrostation. Döt ahcho hond di junga Manna oh scho üsers Auto umzinglet und üs gholfa zum s passend Trotro finda. Rundum hetts ofach nu gwimmlet vu Lüt wo ummagschraua hond oder Zügs verkooft hond oder ofach sus kli glärmet hond. Im Trotro uf Cape Coast hetts leider nu no 2 Plätz ka drum hommer mössa warta bis seb abgfahra gse isch und a neus ko isch. I dera Zit hommer no da Patrick verhürotet mit ma Kopfmarktverköferin. Da sind dia Fraua wo diversi Sacha uf am Kopf ummaträgid und verkoofid. Für ghanaischi Verhältnis isch schlussendlich alls recht zügig ganga. Is nögst Trotro ihgstiga und zack a halb Stund spöter simmer oh scho losgfahra. D Sarah hett denn no Bofrut (so öppis wia Berliner oder Donuts ohni Füllig) uf am Kopfmarkt kooft und dia sind oh ganz guat gse. Noch öppa 3 Stund Fahrt simmer denn z Cape Coast ahcho. Döt hommer scho chönna ihchecka. Üsers Zimmer isch gad unter am Dach und sehr warm. Noch ma Sandwich zum Zmittag und ma Schwatz mit da Edith (sie hett s Baobab ufbaut) simmer no s Cape Coast Castle go ahloga. D Mama und ih hond halt ofach nix verstanda bi da Füarig aber da Guide wär glob super gse. D Sarah hett üs denn a kurzi Zemmafassig gmacht. Aso i denna Rümlichkeita wo mer gse sind, si d anno dazumal d Sklava festghalta wora bevors verschiffet wora sind. Sozegi wo hond wella flüchta oder sus nöd gfolget hond sind ofach bis zum Tod ihgsperrt wora. Zrugg i da Unterkunft hommer üs wella a Duschi gönna. Wells Problem mit da Wasserzualeitig hond, hond d Duschena ko Wasser und drum hetts halt nu a Bucketshower geh. Kurz danoch sind denn oh scho d Leonie, Sofie und Jenny ahchoo. Zemma hommer denn Znacht gessa und danoch no an Spaziergang gmacht. Noch ma usgiebiga Plauderrundi bini denn is Bett obwohls immer no viel zwarm im Zimmer gse isch.Meer informatie