Kakum Nationalpark

Hüt hommer uf di halbi achti abgmacht ka zum Zmörgala. S Resti hett aber natürlich no nöd offa ka wo mür parat gse sind. Halb so schlimm, dafür hommer nochana en Ananassaft und Pancakes (da mol sinds Crepe mässig gse) mit Schoggisauca ka. Gstärcht hommer üs denn wella uf da Weg macha zum mit amna Trotro in Kakum Nationalpark fahra. Dia vum Hotel hett aber gfunda dass seb no schwirig seg umd wias da Zuafall so wett hett üs denn direkt vor am Hotel scho en Taxifahrer ahgsprocha. So hommer denn ganz nobel könna direkt vum Hotel bis an Parkihgang fahra. Und stellid eu vor, er hett sogär a Klimaahlag ka und well em s Auto glob kli öppis Wert gse isch, hetter sobald d Staubstrossa ko sind, d Fenster zua to und dia ihgstellt. Da isch scho fast bonzig gse. Noch öppa 45 Minuta Fahrt simmer denn im Kakum Nationalpark ahcho. Döt hommer da Canopy Walk gmacht. Da isch a Strecki wo über 8 Hängebrugga füahrt. Dia sind bis zu 40 Meter über Boda. Zrugg bim Parkplatz hommer üs sehr druff gfreut zum is klimatisierte Auto hocka. Zrugg bim Hotel hommer denn festgstellt das mer nard no Zeit aller Welt hond hüt. Well mer aber gad kli sehr warm ka hond hommer üs denn entschieda zum ofach ina Resti am Strand z hocka und chli z sii. Kli Blogg schriba, d Lüt beobachta, am Meer lauscha und Buach lesa. So isch denn da Nomi schnell verganga. D Sarah hett no 2 Buaba troffa mit ma Zettel wos druff gschriba ka hond, dass Schriber für d Schual bruchid. Drumm hett sich denn d Sarah zrugg is Hotel gsputet zum en Teil vu üsna Schriber hola wo sie uf Ahfrog bi caran d'ache gsponsoret übercho hett. I glob sü hond a Freud ka. Spöter simmer denn wieder zrugg hond üs mit ma Eimerduschi abküahlt und so guat möglich gwäscha und sind denn no i a ganz klises Resti gad a üsra Stross go Znacht essa. Anderi Gäst hetts döt koni ka. Sprit honds oh nu no 1 statt wia bstellt 2 ka. S Essa (friede rice mit chicken) isch guat gse. vum Salot hani nu 1 Gabla probiert. Sind etz mol gspannt, ebs Uswirkiga uf üsi Verdauig hett. Falls jo, wirds morn spannend, well denn isch da Plan zum witer bis uf Busua z fahra.Читать далее