Auf nach Busua

Hüt simmer bezita ufgstanda damit mer no vor am Zmorga alls hond könna zemmapacka. Denn hommer üs uf gmacht zum uswärts go zmörgala. Leider hett aber no zimli alles zua ka und so hommer denn halt glich wieder im Baobab House Zmorga gessa. Ahschlüssend simmer mit ma Tuktuk ad Trotro Station gfahra. Hett mi gad wieder a Asia erinneret. A da Trotrostation hett üs da Fahrer gset mür mössid uf di ander Strossasita, bi üs hett denn aber scho a Trotro ahghalta und üs wella uflada. Es hett denn a Diskussion geh zwüschet denna Mates aber eigentli isch oh klar gse dass er üs vor da offiziella Station hett wella uflada und somit bschissa hetti. Bim richtiga Trotro ahcho ischs oh scho fast volla gse. I ha denn da wohl schlechtischt Platz verwütscht. 50% vu mim Platz isch Spalt gse, 25% Sitzbank und 25% Klappstual vum Mate umd wenn dä nöd ghoket isch isch da Stual geg mi klappt. Mür hond denn aber zimli bald no a Frau mit ma Baby ufglada. Dia isch denn uf da Klappstual ghoket, somit isch s Problem vum zruggklappenda Stual besitigt gse. Da Mate isch denn ofach vor si ani gstanda. So simmer denn 5 erwachsi und 1 Baby imna Reiha gse. Original hetts wohrschindli nu 3 Sitzplätz pro Reiha. S Baby isch aber so herzig gse, dass mer d Engi nöd viel usgmacht hett. Sobald denn dia 2 Manna nebet mir usgstiega sind hani für en Moment oh kli meh Platz ka. Es sind immer wieder Lüt ih- und usgstiega. So hett sich denn da Sitzplatz oh immer kli gänderet. Wo mer z Takoradi ahcho sind hommer denn oh zimli schnell a Taxi ufgschwätzt übercho. Mit dem simmer denn über Agona bis uf Busua gfahra. Spötestens ab Agona isch d Stross denn richtig schlecht gse. Mür honds aber überlebt. Hond denn scho bald könna ichecka und üsers mega schö Zimmer mit eignem Bad bezücha. Am Nomittag simmer no kli im Meer go Bada gse, hond üs bi da Fruchtfrau Ananas ufschnida loh und hond s schöne Wetter gnossa. Noch ma erfrischenda Duschi (isch oh sehr nötig gse) i da Tree Shower hetts denn scho bald Znacht geh. Danoch hommer no paar Runda Arschlöchla gspielt und sind denn scho bald müad is Bett gheit.

mehr Fotos folgenもっと詳しく