Villa Dolores

Ide letschte Tage simer vorauem viel Outo gfahre. So wird eim ersch recht bewusst, wi gross ds Land isch. Trotzdem hei mer viu gseh u erlebt.

Am Donnsti simer in Federación imne Thermalbad gsi. Mir hei dert zwar dr Autersdurchschnitt recht abzoge, aber es het mega guet tah. Die warme Quelle si aui duss. Guet wirds da richtig Norde wieder wärmer. 😊

Am Friti simer rächt es Stück gfahre u hei im ne Park z Mittag gässe gha. Ir Unterkunft simer mega lieb begrüesst worde u di het e mega Freud gha ab üs zwöi Schwizer 😄

Am Samschti simer wieder voller Motivation losgfahre für ne Wanderig zu schöne Wasserfäll z mache. Da het üs aber leider dr Wäg e Strich dür d Rechnig gmacht. Dr Wäg isch nämlech mega matschig gsi u da mir sones töif gleits Outo hei, heimer paar mau chli unde agschlage. Wos de e mega See het gha, heimer de umträit u promt simer bim rückwärtsfahre bliebe stecke im Schlamm. Nach paar mau spuele u stosse u mit viel Teamwork simer de dert doch no usecho. När ischs üs gad chli verleidet uf Dräckstrasse z fahre u üses Outo het leid drigseh. Jänu, de heimer üs es anders Programm gsuecht u si zu so Jesuiteruine gange. Ds isch e Tipp gsi vo mire Gastmuetter. D Jesuite u Guarani hei i dere Region recht e ifluss gha u es isch no idrücklech gsi. Am Abe simer när i üses Airbnb in Posadas.

Am Sunnti simer de chli ga Posadas aluege. Zersch mau zum aute Bahnhof, ner no zu paar so Statue am Flussufer. Vo hie gseht me oh direkt uf Paraguay, ds liegt gad am gegenüberliegende Flussufer. När simer no witer zur aute Bahnlinie u dere simer entlanggloffe. Es het üs gad guet tah, mau nid so viu Outofahre u üs chli z bewege. Im ne Kafi heimer de no üsi Schoggiglüst gstiut u üsi Reis plant. Morn geits ume es Stück witer i Norde.Read more