Grenelle

weni würd schribe, i heig uf dr rückfahrt no e übernachtig ds paris buechet, würd das töne, wi‘s e 59-jährige maa hätt gschribe. drum bruuchts hie es contemporary wording: i ha e stopover in paris iigleit. so richtig globetrotter-mässig: e haube tag u e nacht. auso nüt wi ds gepäck im hoteu deponniere u iche i ds getümmel. i ha myr vorgnoh, chli d hotspots ga abzarbeite. wi ne asiatische pouschauturischt - aber immerhin z fuess. mau ga luege, wi gross d iischränkige wäge olympia si.

a eifuturm chunnt me im momänt nid ganz häre. dr ängscht beriich isch gschperrt - me bruucht es rächt tüürs ticket für iche - oder me heisst carla bruni oder so. aber es hett ömu glängt für einigermasse id nächi. auerdings hani mi scho gfragt: was ergit das fürne sinn, e olympiade zmittzt i sore wäutschtadt dürezfüere? vor auem, weme när no so müschterli mitüberchunnt: während de schpiu si d metroticket tüürer aus süsch. ab nächscht wuche choschte si wyder normau. soviu zum olympische gedanke. aber item. dr eifuturm hätte myr auso abtschegget.

wyter zum arc de triomph. dert hetts eigentlech keni iischränkige. ke wunder: das isch ja o e houptverchehrsachse. weme die würd schperre, gäbs e kollaps vom schtrübschte. vo dert us bini när d avenue des champs-élysées abeflaniert. natürlech geng mit em chanson vom joe dassin im chopf. das isch sowit o problemlos ggange. grediuse müesse lache hani bim aablick vore länge mönscheschlange. di si tatsächlech vorem lade vo louis vuitton aagschtange - wär zum hänker tuet sech so öppis ah?

haub unge isch auerdings fertig gsi. ab dert bis zur place de la concorde isch wyder zone interdite au public gsi. da ig ja äbe nid zur elite ghöre, hani müesse umdischponiere. d carla bruni isch ja scho vergäh - u ig oh. i by du mit dr metro zur pont saint michel gfahre. mau ga luege, wis dr notre dame so geit. krass: di isch geng no kaputt. es isch e gigantischi bouschteu u d chiuche natürlech nid zuegänglech. i ha nid usegfunge, wi lang di bouarbeite no duure. villech zieht ja d bouschteu sogar meh lüt ah?

wasi aber ha usegfunge: d luft isch duss gsi - bi myr, meineni. grossschtadt, 30 grad u z viu lüt: je suis trop agé pour des bêtises comme ça. auso no chli i ds hotel ga chille - wine 59-jährige maa haut.Read more