Flug und Cruise boarding🛫🛳

Früh am Morge ischs dänn Richtig Züri Flughafe gange. Dur alli Kontrolle und Sicherheits-Checks simer erstundlich schnäll und eifach dure chou.😅👍
Zum Schnappschuss vu üsne Travelbuddies und üs zwei: 👋
Da hemer zum eine de Löre, zueständig für s Bewahre vu de Glasseheit i de Gruppe und ab und zue mal emene guete Witz.😂
Und zum andere d Rachel, wo sich fürsorglich um s Wohlergehe vu allne kümmeret und de Ziitplan im Aug phalted.⌚
De Patrick, verantwortlich für spontani Ifäll und allgemeins troubleshooting💭
Und ich, wo zum eine s Fototagebuech probiere möglichst spannend und usführlich z führe und luege, dass mer nienets öppis vergässäd.📸
D Ziit im Flugi isch wortwörtlich wie im Flug ume gange. Die ca. 1h 45min hemer mit Games und zum Fensterli usluege verbroucht.
Nach de Landig in Barcelona simer vumene Shuttle zum Hafe gfahre worde.🚐
Det hend scho jensti grossi Chrüzfahrtschiff uf ihri Passagier gwartet und mir sind us em Stune fast nüme use chou.🛳⛴🛥😱
Ändlich hemer uf de AidaCosma chöne boarde und eus uf em Schiff umluege. Innert chürzister Ziit simer dänn i einere vu de zahlriiche Bars glandet und hend die erste Cocktails trunke.🍹🍍🧊 Zum Stille vum Hunger hemer üs en Burger im Resti "Best Burger @ Sea" gönnt.🍔🍟
Aschlüssend hemer üsi Kabine chönne bezieh und s Gepäck uslade. D Kabine gfalled üs guet: Grüümig, suuber und modern. Bim Ablick vu de weiche Bettli hemer alli nüd chönne wiederstou: Nur schnäll chli aneligge und d Sicherheitsawiisige läsä hemer welle, aber sind dänn all vier innert Sekunde vertschloufe.😅
Nach dem super Powernap simer fit gsi für d Sicherheitsschulig a Deck, für die mer üsi Schwimmweste hend müsse montiere.😂
Und dänn häts ändlich chönne losgou mit em Spass: Zerst hemer mal s Schiff so guet wie möglich erkundet und alli Agebot abcheckt. Dänn simer a Deck und hend ufs Losfahre vum Schiff gwartet. Wo sich das riese Schiff langsam in Bewegig gsetzt hät, isch richtig Freud ufchou. Alli hend zum Abschied de Lüüt am Hafe gwunke und mer sind Richtig offnigs Meer losgfahre.🌊
Zu dem Ziitpunkt isch d Sunne scho fast undergange gsi und s hät gwindet a Deck. Drum simer i eine vu de Whirlpools im Innebereich ghocket und hend chli bädelet.🌅👙🩳
Nach enere warme Duschi isch de nächsti Programmpunkt dänn s Znacht gsi. A dem grosse Buffet hät jede öppis Feins gfunde und so hemer am Schluss chum meh Platz gha für die feine Schoggifrücht, wo mer sälber hät chönne mache amene Schoggibrunne.🍫🍌
Zum de Oubig usklinge lou, simer numal gu Cocktails trinke i drü verschiedene Bars mit live Musik.🥂🎶Read more