- Show trip
- Add to bucket listRemove from bucket list
- Share
- Nov 30, 2023
- 🌧 29 °C
- Altitude: Sea level
- Sri LankaSouthern ProvinceTalalla SouthGandura Bay5°56’42” N 80°37’20” E
Tri, Tra, Talalla
November 30, 2023 in Sri Lanka ⋅ 🌧 29 °C
Dr Tuktuk Fahrer het üs irrtümlecherwis nach däm Strandtag statt zur Bushautestell gad bis zur nächste Unterkunft gfahre. Ds het de üs nüt usgmacht u bereits 20min nach däm mr Hiriketiya verla hei gha, simer im Dunkle in Talalla acho. Nach es biz sueche heimer üsi Unterkunft gfunde u dr mega nätt Bsitzer het üs mit zwöi Tassli Tee i Empfang gno.
Zum z‘Nacht simer de o gad i sis Restaurant ar Houptstrass ga ässe. Si hei sich mega Zyt gno und hei üs zwöi riese Menues serviert. Mis Curry het gfühlti 10 verschidni Bilage gha, jedi mega fein und einigi ar Laura viu z scharf 🌶️
O ar Laura‘s fried rice hät fürne chlini Familie glängt. So simer de überässe mitemne grossä Sack mit de Reste zrügg zur Unterkunft.
Nach däm mr schnäu igschlafe si, ischs leider nach guet 2 Stund vrbi gsi mit pfuse. D Hitz im Zimmer und die unkontrollierbar chauti Klimaalag heis schwirig gmacht e agnähmi Temperatur härzsteue.
So simer de nid so erhout am haubi 10ni zum zMorgä erschinä :) Mir hättes üs äuä chönne dänke das dr so lieb und zuvorkommend Host üs o zMorgä fürnä haubi Armee uftischet. Nach zwöi Egg-Hopper mit Spieguei, drünä normalä Egg-Hopper und zwöi Banane heimer de nüm mögä u si a Strand gloffä.
Talalla isch (no?) ke grosse Tourispot ar Südküste obwohls aues drzue hätt: E breite, länge Sandstrand und Paume. Dert heimer üs uf eini vo de wenige Liegine pflaschtet und d Wärmi gnossä. D Sunne het brätschet und mit dr Füechtigkeit simer froh gsi heimer üs immer wieder chönne im Meer abküehle und vrsuecht de grossä Wäuebrächer uszwichä.
Dr Himmu het öfters so usgseh us chiem nächstens dr Monsun, glücklecherwis ischs mega lang trochä blibä. Dr Hunger het sich sehr i Grenze ghaute u de simer ersch uf di 6i zrügg id Unterkunft u hei nachere Duschi üsi Räste vom Vortag vrspiesä. Ds si no so viu gsi das mrs gad knapp hei mögä :) Dussä hets immer wieder gregnet u so heimer üs e gmüetleche Fium-Abä gmacht. Guy Ritchie‘s „Der Pakt“ het üs beidne gfaue und so si mr när dick ipackt mit dr Klimaalag loufend ipfuset.
Am nächste Morgä heimer nomau e ladig Egg-Hoppers inedrückt und üse so härzig Host het üs no e Süessigkeit us Kokosnuss, ipackt ines Blatt, härä zouberet.
Dr Bluetzuckerspiegu isch somit wieder gnue höch gsi üsi Rucksäck z bugglä und 2min ad Houptstrass z loufe um dr Bus nach Matara z vrwütsche. Vo dert simer de gad witer nach Mirissa wo üsä Fründ scho gwartet het :)Read more