Baishabi

Ich has ah die untersti Spitze vo Taiwan gschafft - ih Kenting Nationalpark. Mis Hostel esch grad vor ehm Nationalpark in Henchung gsii. Ich ha vo det us ehn Roller gmieted (also es 50g fahrends elektro Ding) und bi die ganz Küste abgfahre 😊. Ich bi vorhär no nie Roller gfahre und bi drum scho chli stolz gsii hani das trout. Es esch au de perfekti Ort gsii zum üebe. Es hed chum Autos gha aber d Strosse sind sehr breit und super usbout gsii 😁. So bin ich vo schöne Stränd zu Klippe und Waldwägli gfahre und ha de Tag mega gnosse! D Ussicht esch werklich eifach unglaublich schön und einisch esch ehn riisige Aff (ned nor so es mini Ding wie mer überall gsehd) vor mer über d Stross gsprunge 😃.

De nöchsti Tag esch ehn chiller-Tag gsii 😅. Ich ha viel Gläse und chli mit de Lüüt im Hostel gredt. Wos am Obig chli abküehlt hed bini no durs Stätdli gloffe bis zu ehmene chline See und uf ehm zrugwäg öberd Stadtmuure. Im Hostel hani de Engländer weder troffe wo ich scho sit Taipei känne und immer weder überall triffe well mer zimlich die glich Route möched. Es esch au s erste Hostel gsii wo ich anderi Backpacker troffe ha siit Taipei. Mer sind denn also alli no chli vor ehm Hostel ghocked, händ Bier trunke und Reisetips ustuscht.Read more