Entschleunigung in NYC?

Noch drü Halbmarathon a drü Täg isch euse Plan für hüt gsi, chli en ruhige Tag zgnüsse und chli z entschleunige. Obmer da gschafft hend? Mal luege.

Gstartet hemmer i de Nöchi vo de Grand Central Station mitme üppige zMorge. De Tina ihres chli fenchellastig, aber fein. Bi mer zwor fein, aber es isch mer de doch echli zviel gsi und ich wird die nöchste paar Täg wohl uf Egg Benedict verzichte.

Nachme churze Stopp bi de Grand Central Station simmer zum „Roosevelt Island Tram“. Mit de Luftseilbahn aka Tram simmer de übere uf d Roosevelt Island. Eusi Hoffnig, dases ruhiger isch, het sich bestätigt. En gmüetliche Spaziergang zum Lüchtturm, womer de au gad na für euse nöchst Stopp iicheckt hend.

Uf de Suechi noch ässe simmer wieder uf Manhatten. D Tina het unbedingt welle en HotDog vomne Foodstand probiere, will min Mage vom Morge nani so fit gsi isch, hani ihre die Erfahrig eleige überloh. Vorher hemmer aber na en Abstecher is MoMA gmacht, sägemer so, mer sind det vorallem ufs WC und hend de Plan für de Namittag usgheckt.

De HotDog isch schnell verputzt gsi und mitme „ja isch okee“ bewertet worde. Chamer mal mache, muemer aber ned.

Mit de Metro simmer de zu eusem nöchste Stopp, de Battery Park City ines Kafi. Für mich hets det es verspötets zMittag geh und für d Tina namal en Iced Latte. Mer hend au det d Rueh chönne gnüsse und de Auge chli Abwechslig chönne büüte mitem Blick uf d Staten Island, Freiheitstatue und de Hudson River.

Nachme churze Abstecher is Oculus simmer de mit de Metro nach de 4ne is Hotel düst und hend chli packt. Morn gahts ja scho wiiter. Willmer hüt gad i unmittelbarer Nöchi vom Hotel gönd go zNachtässe, hemmer eus chli spöter wie susch wieder uf de Weg gmacht. Als Abschluss hets en feine Burgeri mit Garlic Parmesan Fries vom Shake Shack im Madison Square Park geh.

Hemmer etzt chönne Entschlünige? Ja und nei. Mer hend zwor wieder knappi 20km i eusne Bei, aber hend hüt en huufe Pause gmacht und hend au die ruhige Siite vo New York döffe kennelerne.Læs mere