Zwischen Sirenen und Skyline

Mit strahlendem Sunneschii simmer hüt begrüesst worde. Aber vo dem hettmer sich hüt ned dörffe lah tüüsche. D Temperature sind um einigi Grad gsunke und es isch en Wind gange. Da hemmer aber ersch gmerkt, womer scho unterwegs gsi sind. Zum Glück hemmer aber na es Jäggli debi gha.

Bim Brunche im Beardi isch am Afang na alles entspannt gsi. Womer fascht fertig gsi sind mit Ässe, sind d Luutsprecher agange mitere Alarmmeldig. Vom Kafi hets aber niemer interessiert und de hemmer au nüt degliiche tue. Chum bini ufem WC gsi, isch plötzli de Alarm luut losgange und d Liechter a de Decki hend blinkt. D Mitarbeiter vom Kafi hend wiiterhin nüt degliiche tue. Dusse hend sich immer meh Businesslüüt versammlet, wo vo ihrne Büro i de Wulchechratzer usecho sind. Usegfunde was gnau los gsi isch, hemmer bis etzt ned.

Mitem Schiff ischs denn ufd „Toronto Islands“ wiitergange. Mer hend namal e schöni Sicht uf d Toronter Skyline döffe gnüsse, damal im Helle. Leider het scho vieles zue gha uf de Insle, mer hend da aber gad gnutzt zum eusem Körper und Geist chli erholig zgeh. Nebem spaziere dur d Pärk und Wälder hemmer au eifach mal halt ufemne Bänkli gmacht mit Blick ufs Wasser.

Willmer beid zimli fuul gsi sind, hets nachme Abstecher in Shop vo de „Hockey Hall of Fame“, wo d Tina en Puck als Adenke kauft het und emne zMittag usem Supermarkt na en chli längere Halt imne Kafi geh.

Früsch dusched hemmer eus churz vor de 6ne uf de Weg zum CN Tower gmacht. Pünktlich zu Sunneuntergang simmer uf de Ussichtsplattform gsi und hend die wunderschöni Wiitsicht gnosse. Vom CN Tower hettmer au gad uf de Billy Bishop Flughafe gseh und mer hend fasziniert nebem Usblick au d Start und d Landige vo de Flüger beobachtet. Natürli simmer de au na en Stock tüüfer und hend es typischs Touriföteli na gmacht.

Imne italienische Restaurant hemmer de Abe bi feine Spaghetti und d Tina mitme Glas Rotwii us de Region vo eusem nöchste Halt beendet.Baca lagi