Wo Kanada glitzert und kracht

De letscht Morge in Toronto isch abroche. Hüt hemmer mal s zMorge vo eusem Hostel usprobiert, schliesslich isches ja im Priis inkludiert gsi. Demit d Tina aber au en guete Kafi het zum zMorge, simmer zersch na rasch is „Found Coffee“ en feine Kafi und Matcha go hole. Guet gstärkt hemmer eusi Koffere packt und sind zu de Autovermietig.

Us Toronto usecho het sich als Labyrinth entpuppt, aber mer hends denn na uf de Highway gschafft. Na gschwind ChatGPT nach de Verchehrsregle gfragt und de isch Niagara Falls au scho nöcher cho. Nachme churze Stopp imme Starbucks für die obligatorisch WC und Kafipause, simmer nach öpe 2h in Niagara Falls acho.

Hüt ischs wieder unglaublich warm gsi. Do hets Gestöber vo de Wasserfäll e gueti Abchüelig bote. Ufem Weg zu de Niagara Falls simmer a de erste Casinos verbi und mer cha sich guet vorstelle, wie hüt Obe alles blinkt und lüchtet. Es zMittag vom Subway hets mit Blick uf d Wasserfäll geh. Guet gstärkt simmer einisch nach rechts gloffe, ufem Retourweg hets en Halt im Giftshop mitme Kafi geh und de simmer Richtig Rainbow Bridge und zrugg zu eusem Hotel.

Die unglaubliche Wassermasse sind absolut beiidrunkend. Am Tag wie au i de Nacht. Luut und Bunt gohts ned nur bi de Wasserfäll zue und her, sondern au i de Strosse vom Städli.
Hoffemer mal ganz fest mer chönd hüt zNacht guet schlofe.

Nachem zNacht imne Steakhouse hemmer eus nachli d Bei vertrette und en chline putzige Waschbär uf sim Abigspaziergang atroffe.Read more